90後新手媽媽報到 (17weeks + 5 days) - meimeiiikwok的日誌 - Baby Kingdom - 親子王國 香港 討論區

90後新手媽媽報到 (17weeks + 5 days)

已有 10 次閱讀 18-7-28 17:22 |個人分類:懷孕中

一位90後嘅新手媽媽。

未有生菜包(小朋友嘅小名)之前,同好多香港女仔一樣,對化妝扮靚﹑keep fit減肥﹑流行文化都好熱衷。

雖然未去到李佳芯喺BB來了咁女強人,但都從來未諗過咁早生小朋友

(起碼唔係20幾歲就生小朋友先)

而意外有咗之後,都經歷過所有媽媽知道自己有咗之後嘅情緒︰喜驚悲歎

(有睇過黃子華嘅姐妹應該會知道個gag)

真係有諗過唔要個小朋友,因為另一伴都仲未係好成熟,而且雙方都似乎未ready做爸爸媽媽

(唔好鬧住︰未ready就戴套啦/ 未ready就唔好做啦……etc)

但真係好打從心底遇到個唔成熟但好識諗(好似互相矛盾咁)嘅另一伴,

係佢話俾我知未ready就一邊ready一邊學一邊做,冇咩係唔得。生菜包係一個生命,係佢揀咗我哋,唔係我哋揀佢。

所以係短短4個月入面,我由以前嘅一個「死廢青」變成一個隨口都講到或多或少嘅正確育兒知識嘅準媽媽。

(呢4個月可以話係我吸收知識最快同積極嘅時間。如果邊書嗰陣有咁西利,就唔洗邊得咁辛苦。)

雖然呢短短4個月要經歷嘔到暈﹑便秘到喊﹑失眠到炆﹑爆瘡到癲等等以前從來冇試過嘅情況,但係第一次聽到生菜包嘅心跳﹑第一次見佢﹑第一次感受佢喺個肚入面郁等等都令我同另一伴覺得自己冇做錯決定。

我同另一伴雖然唔會係完美嘅爸爸媽媽,但我哋一定會俾能力範圍入面最好嘅嘢小朋友。

我相信大部分為人父母都一定係咁諗。

本身係一個好內向嘅女仔(現家有咗好似唔可以再叫自己做女仔),所以冇咩朋友。身邊亦都冇朋友生過小朋友,所以有關懷孕﹑坐月﹑育嬰等等知識除咗上網慢慢睇,就冇其他方法,所以希望可以透過親子王國認識多啲媽媽,大家交流下心得,順便擴闊下自己個社交圈子。

所以,就請大家多多指教啦!

感動流淚

清新流暢

到此一遊


豈有此理

評論 (0 個評論)

facelist

你需要登錄後才可以評論 登錄 | 註冊

© Baby-Kingdom.com Limited. All rights reserved.