呢幾日小編見到公海有好多 post 討論緊大台熱播嘅劇集《BB來了》，原因除咗係劇集內容貼地，引起媽媽共鳴之餘，仲有人發現BK「上咗鏡」，好有親切感喎！
除咗化身為「港媽王國」，劇中出現嘅術語亦似曾相識，62、99、C9、C6等等，而家就等小編同大家講解吓呢類BK成日用到嘅網絡術語啦～
喺 BK 見得最多係大家以JM相稱，記得有次小編同朋友提起，佢問我係咪講緊 Janice Man......其實 JM 即係姐妹咁解，就好似隔離討論區嘅巴打絲打咁，叫得親切啲咁啫～
然後就係數字人系列，62、99、29 係廣東話同英文（Nine Nine）嘅譯音，分別代表老爺、奶奶同二奶，貪佢打出嚟夠方便吖嘛，最初係邊個咁有創意諗出嚟小編就唔知喇！
跟住就係C9同C6，睇落好似但差好遠㗎！小編最初都成日撈亂，C6 係死佬，即係自己老公；C9 係師奶，但呢個應該冇人想用嚟形容自己掛？
仲有一類係英文縮寫，FTM 同 WM，即係 Full-time Mom 全職媽媽同 Working Mom 在職媽媽。
希望幫到大家更了解 BK 常用嘅網絡術語啦～
