老師話今日晴晴可以由原先番個半鐘加到兩個半鐘,嘗試吓0係學校食埋嘢至放學,但係今日我有事要十二點半出到佐敦,所以就交由姨媽揍放學,橫豎下星期番工後都要交托比姨媽,順便當預習啦.
番到坑口大約兩點鐘,0係街市買完菜就去銀行換簿仔,平時番工好難有機會做呢啲嘢,又要用自己僅有0既一個鐘食飯時間去排隊,有時人太多唔夠時間,排咗隊都要放棄,做打工仔真係慘!
都攪咗三十至四十分鐘至可以去接晴晴,當我上到大家姐屋企時,晴晴已經瞓著咗,平時佢兩點鐘左右就瞓晏覺,今日已經遲咗啦,可能佢想等埋我,但係最終都係敵唔過睡魔.不過唔夠一個鐘就醒咗,始終都係陌生地方啩,而且聽姨媽講,佢0係學校同埋姨媽屋企都會間唔中問起媽媽0係邊,不過問完又會繼續玩或者睇電視啫.