有時喺講座講開一啲嬰幼兒照顧的冷知識，會攞到唔同人客嘅反應。例如有時當問到， BB其實使唔使飲水呢？
好多時就算係新手爸媽，都會識答: 其實BB淨係飲奶就夠啦，唔使飲水架。
不過，如果係兩母女來聽講座, 或是奶奶同新抱來, 答案就可能未必一樣。
當我解釋BB 0-6個月其實都唔駛飲水….. 嘅時候, 準媽媽就會同媽媽 / 奶奶細細聲講: 嗱, 係唔係呀? 營養師都話BB唔駛飲水架!
點知喺呢個時候, 準婆婆/嫲嫲有機會會突然好大反應, 然後大聲反駁: 咩姐! 飲啖水之嘛, 有幾大問題啫? 你細個嗰陣時咪又係咁俾你飲? 唔好話飲水, 細個驚你唔夠營養, 仲會開埋葡萄糖水俾你飲啦!
係, 以前老一輩, 成日怕阿B 唔夠水: 人奶怕佢唔夠飽; 奶粉怕熱氣; 天氣熱流汗; 天氣凍又怕皮膚乾燥….. 於是呢, 好多時習慣飲完奶俾BB飲多兩啖水「浪」吓個口, 覺得飲少少水健康啲。
其實, 世衛都建議頭6個月BB「純」母乳餵哺*。「純」母乳 的意思, 是指沒有其他食物和飲料, 包括埋水 (不過如有需要可添加維他命或礦物質補充劑) .
初生BB唔適合飲水, 一方面飲水會影響他們的正常飲奶量和時間表; 而且BB的腎臟很小, 未發育健全, 飲水有機會影響BB的腎功能, 甚至水中毒**。
一個家庭迎接一個初生B, 全家上下都一定緊張期待, 但好多時大家可能都會有自己湊B的一套: 有時過份緊張, 有時危機意識不足, 但有更多時侯可能唔夠與時並進。所以迎接一個新的家庭成員, 最好大家都花少少時間去增值一下, 學習番一啲最科學, 最安全的湊B方法, 成個家庭先可以真係開開心心迎接小生命來臨。
*http://apps.who.int/gb/archive/pdf_files/WHA55/ea5515.pdf?ua=1
**Am J Dis Child. 1991 Sep;145(9):985-90.
