為了生活一星期五天都要去工作，奔波勞累。
上班的疲累，以及照顧小朋友的疲累一齊累積。
攰，唔夠精神休息，往往就會好容易轉變成負能量…
變到無耐性，亦好容易就會發脾氣。
當小朋友做出與自己預料之內嘅行為，例如小朋友食飯已經食得慢，食食下飯飯又堅持話要飲水，你叫佢食完先飲，佢堅持唔肯。
咁呢個時候，第一句你會講咩?
「點解你咁曳，唔聽話?」
而大人往往都係，當小朋友唔合作，唔配合嘅話，都會標籤為「曳」。
其實會唔會小朋友覺得食物過咸，又或者真係好口渴，所以要咁堅持呢?
我每日都會反思，到底自己對和牛B所做嘅行為、言行是否正確。
而我得出嘅結論係，我一感到疲倦，和牛B唔乖乖配合我要求，我就會覺得佢曳同埋唔聽話。
例如: 快手執玩具、然後刷牙瞓覺，佢懶懶閒唔執玩具，我就會覺得生氣。
但諗深一層，我屋企玩具同埋圖書雖然好多，但係和牛B平日大部分嘅時間都喺婆婆屋企。
所以佢根本想玩呢啲玩具、睇圖書嘅機會都好少。
每晚喺婆婆到食完飯，返到屋企就只有一小時俾佢玩下玩具、睇下圖書。
而對一個玩樂大過天嘅小朋友嚟講，和牛B會唔願意去瞓覺，其實都好正常。
小朋友思想好簡單，亦好率直。
如果父母能夠將工作嘅煩惱、疲倦都忘記，再花點耐性去了解孩子嘅需要。
就唔會再出現，「曳」嘅情況。
小朋友出現搗蛋行為，或多或少係想引起父母注意。
在和牛B嘅角度，其實佢星期一至五都好渴望我同牛爸可以快啲收工返去同佢玩。
呢個就係喺我了解之下，得到嘅答案。
