小JM雖然已經踏入全人奶11個月，但回想起初初小JM降臨的時候，媽媽我真係有啲「拿手唔成勢」，始終係初為人母，有好多野都係「第一次」做同試，真係又新奇又緊張。
特別記得當我遇上小JM第一次厭奶期，簡直就似由天堂再次跌落地獄一樣，真係可以用「來回地獄又折返」來形容！（小JM喺我返工前已經自行戒夜奶，Skip咗半夜三點個餐，可以由夜晚十二點食完奶瞓到第二朝七點）
到底「厭奶期」係咩一回事？點解可以令到媽媽們咁恐懼？不如又一齊討論下研究下。（諗返起都覺得眼訓，半夜不停醒）
咩係「厭奶期」？
「厭奶期」其實係指小B們大咗之後唔再專注飲奶，會成日八掛周邊事物，搞到食下又停下咁，好易受到周邊人和事而影響到進食。
喺厭奶期時，媽媽們或多或少都會察覺得到小B們食量明顯比平常少，但媽媽們請放心，呢個情況係正常（但變相小B會需要食返密啲）。厭奶期唔會維持好耐，過一段小時間小B就會自自然然恢復往日進食態度架啦！
厭奶期會幾時出現架？會有咩徵狀架？
一般來講，小B們會有兩個階段有機會出現厭奶徵兆。
第一階段：三、四個月左右
第二階段：六、七個月左右
厭奶期出現特徵：
．唔太識餓（但精神度同活躍度依舊）
．餵奶時都會將頭扭開／用手推開
．餵奶時會用脷將乳頭／奶咀頂返出來
．不願意吞嚥
．不專注，會四處望來望去，易被外來事物吸引
曾經我亦因為「厭奶」問題而係小JM四個月時問過健康院姑娘可以點處理，我有同姑娘講過小JM食奶嗰陣突然變得好容易分心，只要有屋企人同小JM打招呼／傾計，小JM就會即刻將奶咀吐出。為此，姑娘都建議我係餵奶個陣要俾小B「面壁」，結果又真係好啲。所以媽媽們真係唔需要太擔心，因為喺呢個時期媽媽們只要餵返密啲就可以了。
點樣可以輕鬆過渡「厭奶期」？
其實想要輕輕鬆鬆咁同小B一齊渡過厭奶期都唔係一件難事來嘅，秘訣我就無乜啦，我都係向健康院姑娘取經，再自己同小JM進行「實戰演練」而得來，希望可以幫到各位新手爸爸媽媽啦！
1. 定時餵奶，但不強迫
媽媽們必須遵照以往定立嘅餵哺時間餵小B， 即使小B不願進食也必須跟從，但媽媽可以按小B需求將餐與餐時間拉近少少。
小分享：
小JM曾經厭奶厭到直頭自己skip咗一餐，無論點餵都唔要，樽餵都唔得，所以只好等下一餐早半個鐘至一個鐘餵小JM係啦，結果下一餐又真係好好地乖乖埋身／樽餵都食晒！其實嗰陣有時都會好擔心小JM會餓親，但久而久之媽媽已經變到見怪不怪了！
2. 幫小B們放電
即係同小B們玩多啲，消耗小B們多啲嘅體力，從而增加小B們肚餓感覺，以幫助改善進食。
小分享：
小JM都上過「被放電」，有時放完電都唔一定會食，但就一定會訓，爸爸試過係小JM半夢半醒嗰陣餵，係真係成功嘅。不過爸爸媽媽們就要好小心去餵，以免濁親小B呀！
3. 改善餵哺環境
媽媽們餵哺時可以選擇較為寧靜的房間，將燈光調到柔和一啲、暗一啲，等小B們可以專心一致咁進食。同時媽媽可與家人商量，當小B進食時盡量不要打擾，以免小B因為受到外來干擾而打斷進食。
小分享：
因為小JM厭奶期真係完全唔可以專心進食，結果媽媽我就唯有帶小JM一齊去面壁！情況的確有改善，最重要係要家人都唔打擾先可以完全專心進食。真係一律嚴禁無啦啦Say Hello／傾計！
4.（如樽餵）檢查奶嘴口size啱唔啱小B
爸爸媽媽們要記得每3個月左右就要檢查一下小B們嘅奶咀，以確保奶奶可以好順暢咁流出，因為奶咀洞太細嘅話小B就會自然食得好辛苦，就會唔想進食架啦！
小分享：
要定期檢查之餘亦要留意奶量流出情況，以免有過慢或過急嘅情況出現，因為過急小B食唔切，會有濁親嘅機會，從而嚇怕咗小B；而太慢就會令小B食得辛苦而唔想進食。
5. 餵食前可幫小B按摩／沖涼
爸爸媽媽們可嘗試係小B食奶前約半個鐘至一個鐘為小B沖涼／按摩，可以令小B放鬆，再同小B輕鬆咁玩一陣先再餵哺都唔錯架！
* 通常夜晚嗰餐沖完涼先餵小JM嘅話，小JM都會好乖咁食完就訓，媽媽就可以有自己嘅時間做自己野！
總括而言，其實只要小B們夠濕片、有Bubu／放屁 嘅話，爸爸媽媽們都唔需要太擔心嘅，一時嘅「厭奶期」係唔會令小B對日後都厭奶嘅，厭奶期只會存在係一段短時期而已，只要順利過渡到就無問題架啦！
當然，如果小B持續唔願進食，又唔夠濕片，同時又好似成日無氣無力無精神嘅話，就真係要帶小B見一見兒科醫生啦，以便盡早發現有無其他疾病嘅存在而影響到小B嘛！
