BB未出世，其實已經同媽媽形影不離了有十個月，出世後餵全人奶的媽媽們，更是BB的米飯班主，而有差不多兩個月產假的媽媽，亦有更多時間全天候照顧BB。於是，好多時初生BB有較多時間與媽媽建立感情。
然而，爸爸係老婆大肚懷孕時，確實難以有與BB互動的感覺。始終，只有媽媽能親身感受BB的動態，爸爸就只能隔着媽媽肚皮觀察或感受！到咗BB出咗世，爸爸們又會覺得自己粗手笨腳，唔夠心思細密，而將某一些任務全交與太太處理。
雖然，男人天生同女人嘅構做係唔同，但絕對係唔會影響到爸爸對BB成長嘅影響力！一項由倫敦帝國理工學院，倫敦國王學院和牛津大學共同合作的研究發現，爸爸係BB0-3個月大時，越投放得多時間及越投入同BB嘅互動，BB兩歲時就會有更高嘅認知能力！
而在倫敦國王學院心理學和神經科學研究所工作的Vaheshta Sethna博士指出，他們的研究結果支持父親應該與初生嬰兒更積極互動，所以社會、家庭、甚至是媽咪都應該給與初為人父的爸爸們更多的支持及鼓勵。
Ramchandani教授總結時亦指出，這些在BB 0-3個月大時已較積極與他互動的爸爸，很大機會能持續與BB緊密互動，建立親密關係。
其實，近年越來越多研究顯示，爸爸嘅角色對嬰孩成長有獨特的重要性。所以，在BB出世後，作為爸爸就要更主動去爭取與BB互動的機會；媽媽埋身餵奶後的掃風時間、絕少可以用奶樽餵食的時間、放工回家後的媽媽休息時間，都是一些黃金攝位檔期，應該嘗試與BB多親近，就算爸爸雞手鴨腳、對湊BB無信心，這些親子時光都千萬不要錯過啊！
而媽媽們千萬別嫌老公們做得不夠好，妳給予老公的支持，對他會否更主動與嬰孩互動其實亦十分重要的！
參考資料：
https://www.sciencedaily.com/releases/2017/05/170509083936.htm
