2019-06-30

26.3K

【包媽孕記】QE 順產27小時全紀錄(上)

如果要概括講下湊B日子,就係「好攰好眼瞓好攰好眼瞓」但望住包包就充滿幸福感。回想起當日生產過程仍然歷歷在目,27小時穿水陣痛真係唔係人咁稟!人人都話一孕傻三年,襯仲記憶猶新快啲記低先~

入院前一晚知道預產期比自己遲幾日嘅朋友仔忽然已經生咗,臨瞓仲同老公討論唔知自己係見紅穿水定陣痛先,加上午睡耐咗成晚眼光光瞓唔著。朝早去完洗手間上返床,0635突然聽到個肚好似爆波咁「啵」一聲,心諗係咪佢哋話嘅穿水呢?少少唔知肚痛定M痛,又去廁所坐下,到0705左右抹到有血絲,應該真係見紅,包包你想出嚟啦

通知老公後check一次走佬袋,然後沖涼洗頭開洗衣機洗包包床圍,俾媽媽朋友們鬧到暈:「你該冷靜時會緊張,該緊張時會冷靜。點解仲會走去開洗衣機㗎……」EM……咁洗頭吹埋頭同開次洗衣機差唔多時間,晾埋去生仔好似有效率啲呀嗎……老公打嚟話即刻趕返嚟,拿拿聲吹完頭晾埋床圍,著埋安睡褲0915落樓截的士,接埋老公就直去QE

出發打仗前為自己打打氣﹗

0950去到醫院,去toliet時安睡褲已經成條濕晒要換,好在羊水無整濕人地架車啫。喺醫院餐廳食埋份加大早餐就上B4分流站(食早餐好緊要唔食無力生呀﹗)

1025到B4,入房磅重量血壓check BB心跳,check左宮頸未開

姑娘問症,打電話排埋A11私家病房,俾分排版我,同老公自行去C2產前房。

自己換好病人衫之後,1105喺病床駁機度bb心跳,拎住手掣感覺到胎動就按一下,1125醫生嚟摸肚話已經落咗盤,呢一刻大約10分鐘一次陣痛,話如果穿水耐(穿水24小時)會催生或打抗生素,開咗2度就可以落產房(朋友喺屯醫穿水就可以直入產房㗎T.T)

12點到1點探病時間,老公入嚟陪我去un分娩球,返到床就發覺羊水漏,5病人褲濕晒。。。要換網褲同產婦m巾了。1330醫生巡房聽bb心跳,佢話可以聽朝先催生,因為如果朝早早啲入嚟就有得催,宜家無喎,1445助產士問在場媽媽有無興趣聽talk,講鎮痛方法&如何使用分娩球

加埋我得3個媽媽,2位都無聽過,一入房姑娘叫我示範,咁就一路un波一路聽咗15分鐘,un嘅時候都真係痛多咗啲。。。

1615已經換咗2條安睡褲2條厚身產婦m巾,問咗姑娘話係會keep住流,6至7分鐘左右冤住痛,姑娘話唔算密3分鐘一次先講……而醫生無提催生都係聽朝先會做喎。。。1640突然間個肚實晒加勁啲嘅m痛feel,似乎嚟料啦…不過都係隔5分鐘左右。1655再去un波又痛密咗約3分半鐘一次

到夜晚探病時間,其實已經唔太想講嘢,一來痛二來好灰,明知宜家嘅進度仲有排先可以落產房,探病時間後老公又要走。。。一見到老公就忍唔住爆喊,佢幫我拎陣痛計搵姑娘,3分鐘一次每次痛1分鐘,點知姑娘嚟到淨係話「你個樣未夠痛喎,同我講咗一陣嘢都無面容扭曲,等下啦,呢啲好初步唔使計㗎啦」,完全無摸肚無檢查就走咗

我知道成日煩姑娘,到真係好痛都未必信我,自問已經不哭不鬧,今朝姑娘話咁嘅密度先搵佢,搬龍門,所以我即刻爆喊,姑娘仲要話「做媽媽無咁易㗎條路仲好長,要堅強啲呀」其實待產中嘅媽媽,有時只係想要個希望,即使真係未生得,又或者怕穿咗水成日檢查易感染,嗰一刻真係會覺得,你摸下個肚先都好呀……

未完待續……

更多分享請follow FB Page雲妮手札
https://www.facebook.com/winnie810corner/


下一篇會記錄
到底QE提供咗咩止痛方法?
到底痛到咩程度先落到產房?
筋膜炎雙手發唔到力助產士點幫手?

相關文章:
【包媽孕記】QE 順產27小時全紀錄(中)
【包媽孕記】QE 順產27小時全紀錄(下)[產後房& A11私家房]

【編按:以上內容為作者之個人意見及立場】

相關文章

【生命奇蹟】存活率本為0 21周4天超早產兒留醫143天終健康回家 

孕婦機上分娩 4醫生空服員合力接生 BB享終生免費搭飛機?

婦產科護士還原產房實況 曝新手爸爸「豬隊友金句」

迷信孕媽擇日求醫生提早37周開刀遭拒絕 網民怒斥:足月先出世不及擇日重要?

緊貼新冠肺炎最新相關資訊