上回講到，我有一個可靠過任何人嘅陪月媽媽，皆因除咗「我阿媽」呢個身份，其實佢仲係一位專業陪月員；正所謂，活到老學到老，話說早年阿媽因為唔想成日留喺屋企對住四面牆，所以就周圍搵嘢讀，當中包括陪月員同醫療支援，而其實佢讀嘅時候，根本無打算學以致用，更加諗都無諗過學嚟將來湊孫！（湊孫好像不是她的type～）
呢位新手陪月員，雖然係零工作經驗，但憑住佢個人嘅實戰歷史，再配合新世代嘅湊仔知識，要應付小定咩可以話係綽綽有餘；另一方面，有唔少人都會因為同四大長老教養方法唔同，而出現意見分歧，令到關係麻麻，好彩嘅係課程同時令佢明白到，原來有好多湊仔方法已經同以前唔同，所以都好樂意集思廣益，增強咗佢嘅可靠指數，減少代溝帶嚟嘅湊仔爭拗...
但其實講咗咁耐，到底咩係坐月？又點解要坐月呢？依照我媽所講，由於中醫好重視產後調補，分娩令產婦耗傷氣血，佢成日形容係個人打開咗，就連細到睇唔到嘅毛孔都打開晒，所以既要小心，同時都係改善體質好時候！
產後飲食調節可以分為三個重點坐月、哺乳期及產後調理：
坐月 - 坐月期間產婦會出現一系列生理變化，好似惡露、腹痛、周身乏力等；喺呢段期間嘅飲食要點，主要集中喺消除以上症狀方面，以活血化瘀作為調養原則。
講到活血化瘀，順帶一提有唔少產後婦女都會飲用「生化湯」，幫助排出惡露、促進子宮內膜新生兼補血，但其實生化湯並唔係人人需要或者適合飲；嚴格嚟講「生化湯」只係一個統稱，主要成份包括當歸、川芎、桃仁、炮薑及炙甘草，每位婦女飲用嘅處方都會因應其身體情況，而各有差異；如果有任何疑問，記得問咗醫生先好服用呀！
哺乳期 - 中醫學認為乳汁為氣血所化生，如果產後脾胃健康，乳汁自然多，所以若果選擇做哺乳媽媽嘅你，就應該多加注意飲食習慣，以滋陰養血，健脾益氣作為飲食大前題。
講到滋陰嘅食材，其實有好多，當中包括：響縲、海參、蓮子、百合、杞子都可以，而產後嘅第一個星期就最好清燉雞湯，唔好以為燉雞湯好單一，原來你仲可以選擇竹絲雞、黑雞、無激素雞添！
產後調理 - 無論係順產定開刀，生仔都會造成創傷同出血，產後婦女真係可以話係元氣大傷，無論生理同心理都一樣好需要呵護，而中醫學就提倡固本培元、疏肝解鬱。
但其實咩係「固本培元、疏肝解鬱」先？簡單嚟講，固本培元就係為身體打好基礎，培養元神，主要在於補腎，產後婦女可以選擇食用海參同豬腰；至於疏肝解鬱就傾向從情緒入手，喺中醫角度肝除咗可以為身體排毒之外，仲有排解壞情緒功能，肝腎壯自然身體好，所以一杯暖暖嘅陳皮玫瑰花茶，或者就可以幫到你！
