讀書係每個小朋友必須經歷嘅事，大大話話一般都要讀上最少12年書。有媽媽就出現咗個疑問：「如果佢讀唔到書，係咪代表人生已完？」
我都明白為人父母，當然想仔女讀好書，但父母都要記住讀書只係小朋友人生嘅其中一Part，成績唔代表一切，成績差亦唔代表佢會做唔成人。
再睇真啲，樓主小朋友只係讀緊二年級，有人就提醒樓主唔好咁快就下定論，可能暫時未開竅、未掌握到方法啫……世上無一條規則講明每個人都係讀書嘅材料，正所謂「行行出狀元」，就算讀書成績唔好，佢都可以係為國家爭光嘅運動員、國際名廚、知名化妝師等等。
更重要嘅係，過程比結果重要；眼見過程中樓主小朋友都有努力過，而努力嘅成果亦有目共睹，只係同理想成績仲有些少距離。此時，家長切忌「比說話佢聽」，例如：「你睇吓隔離屋個陳小明同你同年級，人哋考到80分」，小朋友聽落會覺得父母認為人哋比自己更好，而傷咗自尊心；反之，應該多讚賞佢哋：「成績有進步喎，你嘅努力媽咪見得到架，繼續畀心機相信一定會更好」！
讀書難免會有壓力，但假如佢哋為咗考到好成績，而讀到鬱出病，我都可以幾肯定咁講，家長會情願仔女身心健康快樂，成績一般？都OK啦！
作為家長，最緊要教小朋友「做人要有目標肯努力」，嘗試發掘下佢哋其他潛能，只要搵到佢哋嘅興趣，佢哋自然會更有心機去想做好件事。而且佢哋有正確嘅做人態度，人格、學習態度、禮貌先係影響佢日後人生條路走向嘅重要因素。
