好多人會問卡樂B 只有7個月大，點樣創作畫作？！仲要「抽象派」？！其實好簡單！不過就需要時間去預備啦！為了令卡樂B 就算真係真係唔覺意將顏料食落肚，都唔會太大件事，我就決定「自製顏料」！
「自製顏料」方法大公開
材料：
麵粉…………………………… 30g
水……………………………… 100ml
食用色素(橙/紅/綠/啡/藍)…… 數滴
做法：
1. 為了令顏料呈現順滑狀態，建議先將麵粉過篩。
2. 加入水後，攪拌至無顆粒。
3. 開超級細火，不斷攪拌至漿糊狀。
4. 將麵糊分成5等份，加入食用色素後拌勻就可使用。
畫板在$12店買！
將色彩繽紛顏料點在畫板上。
包一層透明包書膠。
之後你與孩子就可以用手或腳，以「按」、「摸」、「拍」等形式進行創作！
成品好有「抽象派」感覺！哈哈！創作過程中，卡樂B 好興奮，係咁「打打」、「拍拍」、「摸摸」畫板！
4-12個月BB 除黑白外，開始望到其他顏色，視覺神經亦會對彩色的東西變得好敏感！創作過程中，色彩繽紛的顏色點可以刺激BB視覺神經，亦可以讓BB觀察顏色的變化，促進大腦發展！各位都可以同BB 一齊試下！
