當初有環保團體呼籲大眾響應「走飲管」的時候，我初時的確有點遲疑！
因為我當時還沒有了解清楚，覺得環保可以有很多方面入手，如果為棄用塑膠製品，點解只著眼走膠飲管？一支膠樽裝飲品所耗用的塑膠，一定會比一支飲管多吧？而且夏天我們最常飲的凍飲都加冰，有冰通常都要有飲管！走飲管，要拎起個杯飲，冰塊順住杯邊頂住個嘴，點飲呀？好凍架喎！但當我睇完網上瘋傳的一段短片，有關一隻大海龜被膠飲管塞住鼻孔，被研究人員強行夾出來令佢痛苦萬分的模樣，我的惻隱之心驅使我去了解更多！
是的！膠樽所用的膠，一定會比一支飲管多，但膠樽可以回收，膠飲管是用完即棄，不能回收的！而且我們未必每天都會買膠樽飲品，但只要我們外出食飯飲野，就會使用到飲管，就當我一日用一支飲管去計算，每年我一個人已用左365支，粗略當香港有一百萬人會每日用一支，一年就已經用左3.65億支飲管！而這個數字已經是被低估，數目原來是很驚人！
我決定開始嘗試去快餐店飲野唔用飲管，聽說心理學上有個說法，要養成一個習慣，只要做21天就可以，我覺得其實只要你有心，一定可以做得到！
經過左一個月的試驗之後，現在我已經習慣不用飲管飲有冰的汽水，其實只要肯去嘗試，原來冇飲管又不是想像中麻煩，可惜每次見到個膠杯蓋，我又覺得慳左膠飲管但即棄左個膠杯蓋，真的有環保嗎？
直至早前KFC宣布會全面停止供應膠杯蓋及膠飲管，我真係拍哂手掌！原來有人同我同一唸法，唔用飲管但用左個膠蓋其實都幾自欺欺人，終於有大機構帶頭為環保做點事，而且做得更徹底！
就係正式實施新措施當日，我帶Timtam仔去支持一下，見到收銀處放飲館的位置完全清空，貼著「脆愛地球」標示，上面寫著：由8月23日起，我們只會在顧客要求下提供飲管及杯蓋！
我簡單的點了汽水及最愛的鬆餅，可能店員見我抱著BB，為我的飲品提供了杯蓋，以免我倒瀉！我眼見其他人的汽水都沒有了杯蓋和飲管，可見新措施仍會為顧客需要提供用品，而且此措施限指堂食，外賣是會提供杯蓋的！
其實很多大型機構已經陸續宣布停用膠飲管！星巴克（Starbucks）早前就宣佈，全球2.8萬間分店將在2020年之前，停用即棄塑膠飲管，可讓未來每年的塑膠飲管減少10億用量。
而我們香港迪士尼，亦已在今年八月起逐步停用即棄塑膠飲管及塑膠飲品攪拌棒，預計每年可減省約四百萬支塑膠飲管！
有人說，膠飲管都要停用，為環保係咪過左火呀？試想想，我們使用膠飲管的時間只有十數分鐘，一支塑膠飲管卻需要400至500年才能被分解，塑膠飲管是地球十大海洋垃圾之一，海洋被污染，經過食物鏈累積，最終受害的也是我們人類！
我們做爸爸媽媽的，要先身體力行，為環保出一分力，再想想冰和飲管是否「必須」？還是只是一個「習慣」？我們又可否習慣不用飲管？
從改變生活習慣開始，灌輸小朋友環保知識，不要小看這微小的改變，每人改變一小步，就能為這地球改變一大步！希望小朋友的將來，地球仍然美好！
可憐的海龜影片：https://youtu.be/JkJ6m7SuAuw
=====================
Facebook: Timtam仔的成長日誌
*~*~*~*~*~*~*~*~*~*~*~*~*~*~*~*~*
