當我哋講環保嗰陣，我哋會諗起咩呢？諗起尐人亂斬樹？諗起尐工廠大廈同交通工具亂噴煙？定係諗起沒完沒了的學校廢物回收活動同廢物利用專題活動？
絶大部份家庭都知道環保係好好同好重要，只不過唔係每個家庭都可以做到喺屋企種植，或者分類回收，因為呢尐都需要珍貴嘅空間。所以有部分家庭的環保生活不能維持太久，或容易放棄。不過，保護環境其實可以係一尐好貼身嘅嘢，例如日常飲食。
我們一直都知道，素食對我們的身體有很多益處，因為素食可減少心臟疾病和某些癌症的風險。原來素食對環境的負面影響是最少的。生產一磅牛肉所需的燃料比一磅菜要多很多，肉類生產也會釋放大量的温室氣體。
為咗提倡少肉飲食，美國喺2003年發起咗一個名為「無肉星期一」(Meatless Monday)嘅非牟利運動，以激勵當地市民喺星期一唔食肉，其實只係星期一唔食肉，已經可以減少百分之十五的食肉量。而選擇星期一係因為希望大家每星期都會有一個健康的開始。
呢個運動好快已經喺世界各地受到歡迎，香港都唔例外。喺2012年，「無綠不歡」(Green Monday)正式成立。佢哋以社企形式，同多間餐廳及學校午餐供應商合作，提供無肉餐單，等我哋呢可以有更多機會接觸同認識無肉飲食文化，仔仔而家讀緊間幼兒園都實行緊架。一直以嚟小米都認為素食係好好，小米仔仔兩歲前都係食素，但始終唔係好識煮同怕小朋友營養唔夠，都要引入肉類。不過而家連出街都可以素食（而且係好味），呢個真係一個好好嘅意念。佢哋個網頁仲有多款素食推介，煮食嗰陣都可以參考下。
放假嘅時候，我都會維持「無肉星期一」嘅習慣，希望仔仔唔會因為放假，而忘記素食對我哋嘅重要。附上幾個餐單，等你哋可以參考下：
| 早餐 | 豆漿麥皮 | 粟米粥 | 粟米菠菜湯米 |
| 午餐 | 蕃茄豆腐炒蛋 時菜 飯／紅飯 水果 | 芝士洋蔥焗薯蓉 水果 | 自製麥芝蛋包配車厘茄 香蕉 |
| 下午茶 | 各式糖水，任揀一款 | 乳酪（可配多士） | 清蒸原條粟米 |
| 晚餐 | 三絲炒麵（椰菜絲，甘荀絲，蛋絲）時菜 | 冬菇絲粉絲節瓜煲 芝士焗西蘭花 飯 | 粟米磨菇洋蔥白汁意粉 |
我相信唔係每個人都可以做到全素食（其實係我自己唔得:P），但一星期一日嘅話，其實並唔係真係咁難，不妨試試。
資料來源：
1. http://www.greenmonday.org.hk
2. http://www.meatlessmonday.com
