以前成日聽人講香港小朋友讀書壓力有幾大，學校有幾難搵，都只係得過聽字，正所謂針唔拮到肉又點識痛，到自己做咗媽媽之後，先真正切身處地感受到嗰份壓迫感，就算平日有幾他條都好，都總會受周邊家長或者朋友影響，引發一個又一個疑問，好似話：「到底使唔使學返三、五、七樣樂器？」、「係咪真係要幼稚園就開始補習？」、「同班小朋友已經喺屋企學緊加數，我小朋友仲係數緊123，係咪太落後？」，喺充滿疑惑嘅同時，再望望移民咗去外國嘅朋友，佢哋嘅小朋友每日都好開心，完全無壓力咁享受校園生活，做媽媽心入面真係不是味兒，到底點解我小朋友要咁辛苦？
近年香港再次掀起移民潮，從學習風氣方面去諗，有不少人都認為移民先係對小朋友最好嘅決定，之但係對於已經有穩定嘅人際同事業基礎嘅成年人嚟講，移民又係咪講咁簡單呢？
討論區熱話：考慮移民的入來傾吓啦!
討論區熱話：全家移民，狗狗也要移民
討論區熱話：考慮移民的入來傾吓啦!
討論區熱話： 全家移民，狗狗也要移民
身為一位媽媽，面對移民潮真係有好多需要考慮嘅地方，彷彿都唔係有錢就解決到嘅事，除咗要諗移民地點係咪適合一家人，又要諗大家係咪能夠適應，係咪可以喺當地搵到工作機會；另一方面，仲要顧慮到留港嘅家人，有JM就話：「其實都掉唔低香港，四大長老要照顧，唔捨得佢哋。」，面對需要轉變嘅種種因素，有人就會考慮近近地嘅台灣作為移民地點：「老公想移民台灣，因為平，生活習慣又同香港接近。」，之但係台灣生活又係咪我哋諗得咁理想？
如果小朋友正值小學、中學，甚至大學階段，有自己獨立思想，有時候都唔係話走，佢就願意一齊走，要佢哋放棄自己原本嘅小社團，重新適應亦都唔係一件容易嘅事，最後移民又會唔會令雙方更有壓力呢？
其實他條媽媽相信每個家庭都面對住唔同嘅環境因素，始終針冇兩頭利，有時候都係你睇我好，我睇你好咖啫，唔好見人人話移民，自己就心急去作決定；至於小朋友讀書壓力問題，最後可能都係取決於家長嘅管教鬆緊，雖然唔容易，但凡事或者都係只係需要搵個平衡點。
