一段健康嘅婚姻，到底係長一個咩嘅樣子？係咪婚前對另一半完全了解，就可以避免關係出現裂縫，白頭到老廝守終老？但又成日聽人話「因了解而分開」喎！
呢邊廂，有人拍拖十年結婚都可以閃離，那邊廂阿邊個另一半又真係做咗爸爸之後唔同晒？！又有人語言不通都一樣可以走到最後...咁到底點先係「啱」？！要結婚不離婚到底應該點樣做？！
最近就有JM喺討論區分享個人吊詭嘅戀愛經歷，未結婚先懷孕嘅佢，頓然發現巴基斯坦籍嘅另一半，竟然連基本溝通都有問題，過往相處都係靠軟件語音翻譯，聽到呢度，Juicy媽啲黑人問題都出晒嚟，乜依家真係透過電話傾偈都會有BB咖咩，就算一擊即中，相處過程唔講嘢咖咩，若然係對話到，都算係溝通到？
「點解好似完全未了解過已經拍拖。」
「重點係你依家接唔接到一個文盲，N冇嘅男人同你過下半世！」
「你對佢完全冇了解，你係因為有咗BB要結婚，定你真係鍾意佢個人，所以結婚呀？」
討論區熱話：請問呢度有無人男朋友/老公是巴基斯坦人
討論區熱話：請問呢度有無人男朋友/老公是巴基斯坦人
其實本來「奉子成婚」喺呢個世代都唔算係咩天大嘅問題，只係你到底準備好未？至於以上個案，其實係講緊另一半對文字書寫能力有問題？而另一方面，國籍不同都構成工作問題，若然結婚，女方要承擔養家責任，由男方照顧小朋友？然後陪小朋友由ABC開始學起？呢啲問題Juicy媽都真係唔識答，之不過世界咁大，確係有唔少創造奇蹟嘅愛情故事，而當中都不外乎彼此擁有堅定嘅心，先可以排除萬難，走到另一個終點。
講返「健康嘅婚姻」，成日都話兩個人嘅成長最重要就係同步，無論友情又好，夫妻感情都好，每個人每日都喺度接收緊新嘅事物，即使比你再了解對方，又唔等於佢唔會轉變，而轉變都唔一定係壞，又或者你一定認同，問題係你願唔願意去理解對方，又或者接唔接受到所謂嘅轉變，若果真係接受唔到，對方又係咪願意，或者接受大家繼續行喺同一條跑道上面。
所以奉子成婚、語言不通呢啲問題，Juicy媽都覺得唔係問題嘅根本，任何關係中雙輔雙成都絕對唔容易，要有放低自己嘅心，去聆聽對方真正嘅想法，但唔係將底線愈放愈低，要有牽手走到最後嘅堅心，而唔係死忍到老嘅愚昧，老土啲講，世界上無一定唔離婚嘅婚姻，亦無注定失敗嘅關係，只係你願意嗎？
