香港樓價有升冇跌，對於好多打工仔嚟講，有啲天價樓係貴到成世唔食唔飲唔去旅行都供唔起。而樓價高企亦間接影響咗好多香港人對婚姻嘅價值觀，好多人因為未儲夠錢買樓而遲遲都結婚，亦有好多人為咗抽公屋、居屋而草草入紙註冊結婚，諗住抽到先一齊住……但係，婚姻究竟代表啲咩？兩個人之間真係只係得間屋做連繫，冇其他嘢？
有網民4年半前同老公註冊結婚，但婚後一直都係分開住，因為個老公話想抽居屋。有一日，樓主有急事打咗電話去佢老公間公司，但老公唔喺位，由同事聽電話，咁同事問係邊位打嚟，想幫手轉達啦，點知一聽到樓主答：「我係佢太太。」同事竟然相當驚訝：「吓？！太太？」
原來樓主老公一直喺公司隱婚，今次樓主打去揭發事件後，個老公竟然嬲咗樓主，話：「我最憎你打嚟公司話你係我太太。」樓主反駁：「係咪覺得我好失禮你？」個老公竟然答：「係好失禮！」
睇到呢度真係呆咗，唔明究竟樓主個老公咩心態！？想等抽到居屋先一齊住都叫做可以理解，但係點解結咗婚要瞞住公司同事？如果只係因為冇特別同同事提起，咁揭發咗之後就唔使發老婆脾氣啦！
睇留言好多網友都覺得樓主個老公有古怪，「結左婚四年半都唔認自己結左婚，個人覺得佢有問題」、「唔好介意，其實你有冇諗過，佢會唔會可能有婚外情，而對象又係佢同事呢？」亦有人提出，個老公有機會只係為咗抽居屋而利用樓主，抽中居屋之後分分鐘過橋抽板！
就算撇開佢老公有冇第三者呢樣嘢，都已經睇得出樓主嘅老公根本唔尊重樓主！樓主又唔係做啲咩傷天害理嘅事，佢係名正言順簽咗字嘅「老婆」！點解要偷偷摸摸好似做賊咁，連講自己嘅身份都畀人鬧？
唔少網民都勸樓主諗清楚，嗰個所謂嘅「老公」係咪真係可以同樓主一齊行以後嘅路？學呢位網民話齋：「分開生活好難維繫一段婚姻，係時候問下自己結婚是為抽居屋，還是真心想同佢一齊生活？記住個答案係要你們一致才是真答案，女人青春有限是否值得拖下去？唔好為過去的付出追討，係要為將來的生活打算。」
婚姻代表住兩個人決定餘生一齊並肩同行，如果兩個人之間只有一張紙或者一層樓，而完全冇愛、冇包容、冇尊重，咁仲係咪一段值得保留嘅婚姻呢？
