最近閒逛Forum，睇到個post令Juicy媽眼火爆！話說有網民呻自己奶奶係傳統女人思想，明明自己個仔好得閒坐喺度（前提係冇受傷／生病／全無不便架喎！）都好意思叫個新抱煮完飯出嚟，都要專程行返入廚房盛湯畀老公飲。冇即時做仲要畀人話。既然同住奶奶又錫仔錫到出晒面，樓主應該為自己發聲！正如有網民話建議咁講：「老公自己嚟啦，我煮完飯好攰」。
亦有網民奶奶聚餐轉玻璃轉盤，都可以轉到新抱面前時特登轉快啲......開完刀生仔奶奶臨走話教換片，想叫醒老公一齊學，奶奶竟然話畀佢呀仔瞓下。生完唔需要休息反而佢個仔要休息？認真搞笑喎～仲有網民坐緊月時，奶奶話BB半夜喊會嘈到佢個仔，叫佢老公返返佢屋企住，意圖留低新抱同未滿月嘅BB自生自滅。
計我話，呢啲行為形容為「傳統」真係太客氣啦。直頭係老土又黑心添啦！有時我都唔明，大家都係女人，點解唔可以互相尊重！係咪舊時畀人當妹仔，而家都要用同一套不公平嘅方式對待新抱？女人都睇唔起女人，唔知咩道理。
其實錫自己個仔係人之常情，真心問，有幾多呀媽見到個仔為女朋友仆心仆仲會樂見其成嘅啫。就好似生女嘅父母，都唔想自己寶貝女有一日淪為人哋嘅家庭工人。
人哋都有呀媽生，憑乜食唔飽著唔暖受人白眼？網民講得啱：當新抱係工人嘅話，叫個仔搵印印賓賓做老婆啦～講到尾，冇人控制到自己遇到點樣樣嘅奶奶，但一定唔好啞忍！
