成日都話「難求好姐姐」，呢句說話應該道出咗唔少僱主心聲，而對於僱主們嘅各項要求，有人會話：「你點對人，人點對你」之但係同姐姐相處過程中，有好多時候都超越咗「點對人」呢個問題。
由於文化差異，而且加上「一樣米，養百樣人」嘅道理，僱主同工人嘅矛盾，往往超出你嘅估計範圍，就好似今日就有JM喺討論區分享嘅呢一對「嘔泡波鞋」...
「之前叫佢幫我洗波鞋，洗完立立炅，我仲心裏暗喜可以洗得咁乾淨，著過一排都無咩特別，點知...有一日，放工落大雨，我下半身已經濕晒，行行下望地下，驚見對波鞋一路行一路嘔泡，直至回到家仲嘔緊。
我直頭覺得自己係周星馳電影裏的搞笑角色。」節錄 anniellm分享
討論區熱話：工人求其搞笑事 - 波鞋嘔泡 （有圖）
換轉係鯊魚太望住呢對咁「驚喜」嘅波鞋，都確係唔知好嬲定好笑，唯有同佢一齊嘔泡！而除咗「嘔泡波鞋」，anniellm亦分享咗另一次經歷：
「又有一次，一家四口去完7日旅行，返到屋企叫工人要洗晒3個篋裏面嘅衫。過咗一陣，我入去廚房，見個工人好似對付殺父仇人咁，係咁將啲衫死塞爛塞入洗衣機裏面。我問佢做咩？佢話：太太叫我洗晒啲衫㗎嘛。我於是話，我叫你洗晒啫，你可以分幾機洗㗎嘛。」
相信呢啲哭笑不得嘅故事，真係經常都會發生喺僱傭關係之中，所以話，其實同外傭姐姐相處真係一門學問，對於姐姐點解成日用爛晒啲電器，又或者，唔知點解洗潔精好似當水飲一樣極速用完，可能同大家文化、教育，甚至言語不全通都有關，最好嘅溝通方法，都係攤出嚟開心見城講、慢慢教，總好過一日到黑估估下，唔知佢係咪搞作對呀！
