成日都話為人父母乜乜乜，喺育兒路上真係有唔少苦中帶甜嘅血淚史，雖然有時候真係心很累，但又好似無得同仔女計咁多？如果時光可以倒流的話，你又會唔會再次選擇做父母呢？
最近就有JM問大家有冇人後悔生咗BB，估唔到都引嚟幾大迴響，而且仲有唔少JM坦言身邊位C6同自己都有暗暗後悔？！
「有細路真係要放棄太多！」
「我叫咗佢唔好喺啲小朋友面前講，但佢照口唔收，我都無晒辦法，所以小朋友都知道晒，仲話下世唔會㨂爸爸做返佢老豆！」
「廿多年前我唔想生，但C6話完整嘅家庭，應該要有小朋友，依家我多咗兩個朋友，我囡仲係閨蜜，一齊買衫、試新嘢食、整cake、講下拍拖經歷、講下C6是非！」
討論區熱話：有冇人後悔生咗BB
討論區熱話：有冇人後悔生咗BB
睇到呢度鯊魚太都有啲傷感，雖然話有咗小朋友之後，好多生活模式都要轉變，而且確係要放棄好多原有嘅習慣，但講到要後悔？會唔會又太過言重呢？莫非真係要塞返佢入去？仲有C6係要當住小朋友面前講好後悔！？到底知唔知道小朋友嘅陰影面積有幾大，你當初生佢有得揀，但佢係無得揀邊個做父母咖！養寵物都要停一停，諗一諗啦，更何況係生仔！
其實所有事情都有失必有得，自從有咗小朋友之後，先唔好講佢帶嚟幾多前所未有嘅快樂，單單係喺個人轉變方面，有咗小朋友其實都令人成長唔少，除咗變得更有同理心，識得顧及別人感受之外，而且有好多時候都更識欣賞豬隊友嘅付出，完完全全係生命影響生命！
至於仔女帶來嘅點滴，相信更加係世上無嘢可以替代，望住佢哋嘅成長同轉變，由未識講嘢到成日駁嘴，其實就只有做父母嘅先可以感受到嗰份又愛又恨嘅體驗！若然去到呢刻，你都依然覺得好後悔，或者應該好好檢討下自己，有無真真正正做過「父母」！
