成日都話做人父母甚艱難，提到要為子女準備同擔心嘅事，有時真係細微到你完全想像唔到，就算係一件看似日常嘅事，都往往都會令你束手無策！
好似最近，就有JM提到每朝返工小朋友都喊到骨肉分離咁款，呢件每日都要面對嘅事，竟然係一場又一場嘅試煉！由去個廁所到外出返工，以至小朋友開始返學，每種形式嘅短暫分別，小朋友都總會有你意想不到嘅反應，聽見佢人仔細細，為咗自己喊到聲嘶力竭，作為父母又點可能唔動容，正所謂「喊在你身，痛在我心！」，呢種痛真係諗起都心如刀割！
「適應要時間，習慣咗就唔喊架啦！」
「 雖然都係10分鐘內，但就好似好耐咁！」
「去廁所一陣都好大壓力！」
討論區熱話：朝朝返工都生離死別咁....
提到分離嘅故事，就令鯊魚太回想起鯊寶初次開學嘅過程，絕對係刻骨銘心！有人講過學校安排嘅適應週，其實對象係家長而非小朋友，除咗要扭轉大人嘅生理時鐘之外，仲要好好學習，點樣面對小朋友出現嘅分離焦慮狀況！
猶記得初初聽到旁人周圍遍尋幼兒分離班嘅時候，當時鯊魚太仲諗：「唔係呀？分離都要學，第日返學仲分離得唔夠咩？何必要小朋友提早學分開？」，不過到咗臨近開學，抱住順應住Playgroup課程升班心態，鯊魚太都有比鯊寶上下分離班，但其實心底就依舊覺得「分離唔使學」，而鯊寶當時嘅表現亦合情合理地，按佢平日性格頭也不回講再見，開開心心上堂，快快樂樂落堂......
討論區熱話：朝朝返工都生離死別咁....
但世事又點會比你咁易估得到，當你以為鯊寶已經非常咁準備分離，佢竟然就來個反高潮！喺正式返學嘅時候，上演一場又一場轟轟烈烈嘅悲情喊戲！每日都死去活來咁款，唔係攬腳就典地，當刻鯊魚太真係又心痛又無奈，但喺老師嘅協助同指引下，亦唯有狠下決心，聽住佢爆喊都要走，真係十足十拍緊骨肉分離戲咁！
慶幸嘅係，原來小朋友要學懂一件事，或者只在於半秒間，經歷咗個半月嘅心如刀割後，忽然有日，鯊寶竟然毫無先兆咁變返嗰個返頭也不回嘅佢，應承鯊魚太返學唔再喊，就開開心心上學去！而或者呢啲就係成長，喺跌跌碰碰過程中，即使會受傷、會痛，但只要你相信自己嘅小朋友，從旁鼓勵同比信心佢，佢就一定可以做得到！
至於講到分離呢一課，鯊魚太覺得每次同小朋友好好道別係非常重要，千祈唔好以謊話或者無聲無息咁消失去打圓場，咁樣只會令小朋友更加無安全感，所以無論過程有幾肉赤都好，都唔可以呃佢，嘗試以簡單嘅承諾或者身體語言，加強小朋友信心，等佢慢慢建立安全感！
