「你同工人姐姐關係好嗎？」喺討論區入面，經常都會見到有唔少大數姐姐們不是嘅post，但無奈香港地真係一街都係雙職父母，淨係星期日行上旺角行人天橋，兩旁奇觀就知道我哋又幾需要姐姐啦！
講到請姐姐，我哋絕對係幸運嘅一群，我家姐姐來自印尼，家中排第三，以偉大嘅廣東話組合兼夾硬嚟方法，佢有一個中文名叫樹珊啲，而其實平日我哋都係叫佢做「姐姐」，樹珊啲之前已經有兩年喺香港工作嘅經驗；由定咩出世前一個月，樹珊啲嚟到我哋身邊，除咗放假之外，足足成800幾日無離開過我哋！
以姐姐嚟講，其實樹珊啲真係好特別，聽聞坊間10個有11個姐姐都會鍾意僱主長期唔喺屋企，貪佢無王管呀嘛...但佢正正係個怕寂寞嘅姐姐；記得之前我哋出發上郵輪，喺送我哋上車之際，佢竟然喊咗出嚟，期間仲不時Whatsapp我哋更新住定咩近況，唔講仲以為我哋去咗365日！
講到別離，上星期終於輪到姐姐撇甩我哋，返印尼放大假，喺返歸之前，佢就已經諗緊買咩手信畀我哋，真係當咗自己去旅行咁！
沒有姐姐嘅日子，首當其衝受到嚴重影響嘅相信就係定咩婆婆，先唔好講工作量激增，話說送姐姐去機場，回程之際，定咩因為暈車浪而嘔吐大作，將整個午餐「獲利回吐」，就係咁兩婆孫全身都係嘔吐物，而當時只係剛剛開車......至於喺公司收到呢個消息嘅我，亦只能深表同情。
隨後嘅幾日，伴隨住貓咪嘔吐、倒瀉貓糧、定咩踢爆腳趾甲、破壞王上身，定咩婆婆勞累度已經到達頂點，而全屋嘅人貓情緒都開始失常，例如黑蕉（家中貓三佬）離奇倒後跳，迎面撞低咗定咩；餘下嘅10日，到底我哋會點過？到底我哋能唔能夠生還，真係請看下回分解......
