俗語有云：「生仔姑娘醉酒佬」，意思係女人生bb辛苦，但過後開心就忘記晒生果陣幾咁痛苦。等於醉酒佬醒之前講過咩嘢都唔記得，唔算數。產婦在生產過程中好多時會辛苦到話以後都唔生，同醉酒佬話以後都唔飲酒一樣。
呢句說話又真係好應喎！我生完第一胎相隔都未夠兩年，又再生bb喇！今次分享第二胎嘅經歷，邊個同我講話第二胎生得冇咁痛苦㗎？搵佢算賬先~
－－－－－－－－－－－－－－－－－－－－－－－－－－－－－－－－－－
四年前的某一日
今胎預產期響2月24號，聽好多過來人都話第二胎係會早啲出世，所以都預計bb會早十日八日出嚟見我哋。響2月14號晚凌晨，我如常地煲梗韓劇。煲到兩點幾去廁所發現底底上有一細灘水狀，諗梗會唔會係穿咗洋水呢？跟住又想再睇定啲先，就繼續煲劇，煲到三點幾先去瞓。好奇怪，瞓覺好多次夢到自己陣痛到好痛，已經分唔出係夢境定真實。
2月15號早上去廁所嘅時候，見到底底護墊上全是血。見紅了！當時屋企只有我同朗朗，我即刻打電話通知奶奶同埋老公。由於上胎餓到我冇氣力生，所以今次一早準備咗盒波仔飯。梳洗過後，我就叮熱個波仔食，食到一半朗朗醒咗，我就一邊抱住佢一邊繼續食。期間我問朗朗：「媽媽一陣去生妹妹，你要乖乖響屋企等媽媽，好唔好？」。朗朗答我：「好！」。過一陣老爺奶奶到咗，我再點算一下個走佬袋，就同奶奶起程往醫院喇！
早上10:00
大約10點到達瑪嘉烈醫院，做完例行檢查後，就瞓床駁機聽住bb心跳聲同埋監察住宮縮。過一陣有醫生嚟幫我檢查下面，話我冇穿到洋水，只係見紅。但摸落子宮口好鬆，應該都會隨時作動喇！
中午12:00
再觀察多一陣，十二點幾響產房食埋飯，就推咗我上去產前病房。陣痛一直都存在，但唔係規律性，大概半個鐘先痛一次。在病房床上除咗食同瞓，就係繼續煲韓劇喇！
傍晚6:00
晚上，家人探訪完，我食完飯再整多件chesse cake，希望食多啲今胎有力氣生啦！
晚上8:00
探病時間過後，陣痛嚟得密咗同埋痛咗，但我仍然繼續煲劇，希望分散注意力會冇咁痛。
晚上10:00
晚上10點幾，病房已經熄晒電視同燈，只係開住暗燈，其他人都陸續瞓覺喇！我嘅陣痛開始有規律地5-8分鐘痛一次。同姑娘講我痛得密咗，檢查後，話我痛嘅時間好短，至少要維持20秒以上先會考慮畀我落產房。
晚上11:00
11點幾，痛嘅程度已經唔能夠繼續煲劇。叫咗姑娘過嚟幫我睇幾次，都係話我未痛得夠密。只有無奈咁響床上繼續默默忍受住陣痛，陣痛一來，我就捉緊床單、枕頭，然後做好呼吸。
凌晨1:00
忍受到凌晨1:45，我再頂唔順頻密而且長嘅陣痛，又再叫姑娘，姑娘嚟到檢查完立刻叫嬸嬸準備call床。太好喇！終於可以落產房，我唔駛再響呢度齋痛喇！
落到產房第一件事就係喪聞笑氣，有一刻聞到連啲儀器同人聲都聽唔到，靜止晒，以為自己死咗。立即鬆開笑氣，啲聲又慢慢番番嚟。陣痛真係越來越密同痛，我不停典床典蓆。有一下典到我忍唔住係咁谷住度氣就屙，跟住「pop」一聲，洋水都穿埋。穿得好強勁！我估當時通地同周圍都畀我啲洋水射到污糟晒。姑娘清理好之後，我就繼續忍受陣痛。冇幾耐老公到咗，我捉住佢隻手爆喊話好痛。進入痛到癲咗嘅階段，每當陣痛一到，我就差唔多揸到老公隻手斷咁濟。我都已經懶得理姑娘不停嘅指示，靜係知道一痛就博命屙……
凌晨3:00
姑娘見我完全唔理佢指示，就將張變形金鋼床打開，俾我試下生。果然，試咗幾下就屙咗bb出嚟喇！仲記得最後一下陣痛，我忍住度氣，係咁「唔……」將bb推出嚟。姑娘幫手「抆」bb出嚟嘅時候，我下面好似俾火燒咁，又一次撕烈的感覺。陣痛終於停下來，隨之而來聽倒bb嘅喊聲。老公嘗試幫bb剪臍帶，但條臍帶好韌，剪極都剪唔開。經姑娘指導後，終於剪斷咗喇！
之後，姑娘按住我個肚拉埋啲胎盤果啲嘢出嚟，又要痛多幾下。最怕嘅聯針嚟喇！雖然今次唔駛剪陰，但因為太用力屙，有啲位置拉損咗。結果忍痛埋呢幾個字嘅時間，終於可以同痛講bye bye。聯完針，好快就有人抱咗bb過嚟俾我餵人奶，真係冇諗過咁快呀！老公陪住我一齊響產房餵咗一陣，一路望住bb，我一路會心微笑。心裡不停想：「bb~ 多謝妳嘅來臨呀！」。
－－－－－－－－－－－－－－－－－－－－－－－－－－－－－－－－－－
第二胎果然真係眾人所講嘅好快生到出嚟，雖然痛嘅時間係比上一胎短咗，不過呢幾小時嘅十級痛楚依然係痛不欲生。我記得響最強烈陣痛期間，我同老公講：「真係生埋呢次架咋！好痛呀！痛死我！」。今胎冇妊娠糖尿，唔駛禁食，又唔駛吊鹽水。食得夠飽，真係好夠力氣生呀！呢次係我嘅第二次，亦將會係最後一次。如無意外，我唔會再入去產房呢個鬼地方㗎喇！
經歷過生bb先會親身體驗到媽媽係幾咁偉大，大家都要多啲愛錫媽媽呀！
相關閱讀：
