936

【轉季濕疹護理】治本第一步,向高危致敏原說:「不!」

唔知大家身邊有冇一啲患有濕疹嘅朋友?濕疹係屬於皮膚過敏同發炎嘅一種,大部份濕疹患者都擁有過敏體質,例如:鼻敏感或哮喘,而呢種過敏體質係有遺傳傾向,通常爸爸媽媽都擁有過敏體質。

濕疹好多時都係因接觸到致敏原而引發,最常見嘅致敏原有食物包括:花生、雞蛋等,而化學物則有化妝品、護膚品及清潔液。有唔少女士可能都試過,用完個新面膜之後成臉紅哂,或者係轉咗新面霜,幾日之後塊面又痕又紅;以上都係因為產品當中嘅香料或其他化學成份引起皮膚敏感濕疹發作。

曾經有病人求診,雙手搽咗長時間類固醇藥膏都反覆發作,有時甚至會有滲水嘅狀況,而該病人無做家務習慣,亦無長期接觸清潔劑或者任何潤手霜嘅,最後發現原來係佢對手袋皮革嘅色料敏感,所以致敏原真係有好多種。

要護理濕疹皮膚,預防致敏原係治本嘅重要一步,例如:懷疑對食物敏感,都唔使心急戒到好清,唔食牛肉海鮮;濕疹患者可以做過敏檢查,目前有皮膚測試同抽血檢查等方法,好簡單就知道自己對咩敏感,咁就唔使盲目樣樣都戒口啦。

另外,而家就嚟轉涼,要留意衣物嘅物料,特別係羊毛就應該要避免,而潔膚同護膚品方面,可以用標示低敏配方 hypoallergenic嘅產品,用護膚品時,可以先試喺手腕內側2日,無咩痕癢紅腫嘅反應先用喺面度。

【編按:以上內容為作者之個人意見及立場】

相關文章

【跟住小編做媽咪】全自購30件空瓶分享 真實評價嬰兒及媽媽護膚品!

【親子急急問】冬日皮膚痕癢又甩皮致濕疹 醫生教你4招急救法

【用家推介】找到一家人用:舒緩濕疹敏感肌的「分子釘」

【護膚診症室】濕疹要戒口?重點出擊K.O.致敏原

緊貼新冠肺炎最新相關資訊