唔知點解小小豬特別鐘意飲蟲草花湯，一次過飲四碗都係等閒之事，既然佢咁熱愛，蟲草花又係有益嘅食材，當然又係密密煲俾佢飲。
今次係用左淮山杞子嚟配蟲草花，有助健脾同明目，依兩方面都係小小豬最需要嘛，所以就......開工啦~
蟲草花性質平和，不寒不燥，含有豐富蛋白質、氨基酸以及蟲草素、甘露醇、SOD、多糖類等成分，能夠綜合調理人機體內環境，對增強和調節人體免疫功能、提高人體抗病能力有一定的作用；准山有健脾胃，補益肺氣，滋腎固精；杞子有滋養強壯又明目 ，對於視力減退,腰痛及糖尿病患者有功效；紅蘿蔔含有豐富維他命A，可以入肺脾之經，能健脾化滯、潤燥明目，可以增強免疫力，亦有護眼功效。(網上資料)
蟲草花 1兩、杞子3湯匙、淮山10片、蜜棗3粒、紅蘿蔔1個、瘦肉約$30~
蟲草花、蜜棗及淮山用清水浸20分鐘~
杞子用清水浸15分鐘~
蘿蔔去皮以滾筒式切塊~
瘦肉汆水備用~
煲內放約3L水，然後加入所有材料(杞子除外)~
待滾起後，先用大火加蓋煲約15分鐘~
之後轉慢火加蓋煲多1.5小時~
最後加入杞子再煮15分鐘~
加少少鹽調味就可以飲得啦~
平時都已經鐘意飲蟲草花湯，今次同小小豬講依個湯仲可以對眼睛好，所以依隻傻豬仲更加喜愛，飲到個肚仔漲卜卜，見到佢咁支持，真係大熱天係廚房煲到辛水辛汗都係值得。
溫馨提示：
由於個別人仕體質不同，所以大家記得煲之前了解下自己，如有疑問，請先向註冊中醫查詢！
