自己病左成個星期，雖然都叫做好返好多，不過都總係冇乜胃口。見有返少少精神，所以就煲啖湯俾自己飲下，同時都要煲俾兩位老細飲，依個星期佢地都係冇啖好食，係時候對佢地好啲啦~
其實今次買雪蓮果係本身當係一種生果食，因為山藥店店主話雪蓮果當生果食係好有抗養化，對皮膚好好添。
聽佢講完我都有上網睇下資料，原來佢係好有藥用價值同埋保健功效，具有潤腸通便，促進消化，調理腸胃；調理血液，清除高血脂，降低血糖、血脂、血壓，有效抑制膽固醇和糖尿病；消涼退火，清熱解毒，祛斑除痘；增強機體免疫、防癌；有消炎利尿等功效
不過老公就唔太想試下當生果嘅味道，咁大粒我一個人又食唔晒，所以最好都係用嚟煲湯，咁三口子就齊齊有得著。見屋企仲有一粒粟米，所以就簡簡單單煲過既清熱又滋潤嘅雪蓮果粟米無花果瘦肉湯啦！
材料：雪蓮果一個、粟米一條、紅蘿蔔一條、無花果五粒、瘦肉約$30及南北杏一湯匙
雪蓮果去皮切塊
瘦肉洗淨汆水；粟米及紅蘿蔔去皮切塊；無花果及南北杏浸洗一陣
將3L水煲滾，然後放入所有材料
待水再滾後用大火加蓋煲約15分鐘
之後轉慢火加蓋煲多1小時
最後加鹽調味，就飲得啦
啖湯真係超級清甜，唔止小小豬鐘意飲，就連平日要求多多嘅老公都讚好飲，仲叫我下次可以再ENCORE添
煲湯最開心都係見到依啲場面，快快手清晒成煲湯，咁先有動力繼續煲落去嘛！
溫馨提示：雖然各種食材都係好溫純，不過始終個人體質都有所不同，我啱飲時又未必每個人都啱，所以大家記得煲之前了解下自己，或者問下相熟中醫/藥材店職員，呢個湯料啱唔啱自己呀！
