好快又到中秋節，唔知大家有冇自己整月餅呢？
以前未結婚時，我會自己出去學整冰皮月餅，學完仲好有恆心地返屋企再整，記得當時我爸爸仲陪我癲，在家中跟我學整。
轉眼間十幾年後，有小朋友了，就當然去玩親子月餅班啦！
早前，同囡囡參加了一個玉兔奶皇月餅班。囡囡對烹飪很有興趣，佢知道我會同佢去月餅班，前一晚已經好興奮，不斷問幾時可以出去呀。
每年的月餅製作班多不勝數，而我選擇了由「Eye Kitchen」舉辦的課堂，首先是因為教授製作兔仔造型，囡囡一定喜歡。另外，價錢亦合理，$420 一堂可以製作六個月餅。最後一個主要原因，係導師主張用健康材料烹調，所以製作月餅的材料係天然無添加。
到達太子「Eye Kitchen」，工具和圍裙已經準備好在枱上，十幾位小朋友都很心急動手。導師先介紹材料﹕奶黃餡用了鮮雞蛋 + 天然雲呢拿油煮成，冇奶粉、冇色素、冇香精，所以製成品的顏色會比較淡。糖方面，用了有機甜菊糖，唔會影響血糖水平，宜家好多健康菜式，都會用呢款糖作調味。
接著，導師先講解同示範頭一半的程序，包括處理餡料、預備餅皮。呢兩個步驟比教簡單，囡囡自己可以應付，所以我無插手，在旁睇住佢做。
然後，下半程序困難一點，要包餡。首先要將餅皮整成窩形，包入奶黃餡。囡囡手掌細，做出來的窩形唔夠大，就包唔晒餡料了。加上動作要快，否則餅皮溶化或太乾，更難包。囡囡就負責極兔仔耳朵同眼睛。
完成就可以入爐。導師話每焗幾分鐘，就要拿出來攤一攤，再焗。大約半小時後，出爐了，好可愛呀，成爐都係兔仔。
返到屋企，急不及待切開來食，好味過外面買的月餅。一來因為自己親手做，二來是導師的食譜的確編得唔錯呢。
