依排啲天氣真係好討厭，成個人都總係覺得好攰好攰咁，所以就煲個袪濕清熱茶三口子飲下，袪袪濕人會精神啲呀
原本我係上網睇到用另一款藥材嚟煲涼茶，不過相熟藥材店店員就介紹我煲此款，佢話方便簡單啲，同埋成效又大啲，所以就依佢說話試煲啦！
主要都係四款藥材，芸苓、白朮、白芍、扁豆衣及半塊片糖
將所有藥材浸洗備用
於煲內準備7碗水份量，然後加入藥材
待水滾後改用慢火煲約30分鐘
最後加入片糖再煲多15分鐘
大約煲埋有約有4碗水份量，可以飲得啦
小小豬好明顯係唔鐘意飲依款涼茶，因為飲兩啖佢就話: 好飽..夠啦..唔口渴呀。不過好在同佢講話有益之後，佢都乖乖地勉強同我飲左大半杯。
坦白講，就連我自己都覺得味道比起我之前所煮過嘅涼茶，依一款明顯係比較藥材味重啲，唔係咁好飲，所以小小豬飲左一杯之後我都冇再迫佢飲，所以餘下嗰兩杯都係我飲晒。
雖然唔好飲，不過飲完之後去洗手間次數係多左，過多日整個人都真係冇咁攰，可能係袪左少少濕呀，所以間唔中都要煲俾自己飲下，袪下濕...人都瘦啲又靚啲呀(哈哈哈...發夢中)！
