澳門娛樂大亨—人稱洗米華嘅周焯華，同混血模特兒Mandy Lieu嘅一段婚外情，成為唔少人茶餘飯後嘅話題；由2015年，兩人上演世紀牽手公開戀情，Mandy Lieu高調成為洗米華與洗米嫂Heidi婚姻中嘅第三者，呢位被譽為「最強小三」情婦，先後為洗米華生下二女一兒，至於Heidi就喺2015年為洗米華誕下幼女。
圖片來源：pakhchau@instagram
喺呢段三角關係中，洗米華夾喺兩女之間，周不時都要四圍飛，其實都幾頻撲，不過就竟然仲有時間同疑似小四、小五傳出緋聞，面對呢個局面，曾經有指Heidi同洗米華將要離婚，不過其後又變返平穩嘅三角關係，令大家以為Mandy Lieu已經疊埋心水做小三。
圖片來源：pakhchau@instagram
不過今日就有消息指洗米華同Mandy Lieu嘅五年情終於玩完，仲話Mandy Lieu收足3億分手費，喺大家嘅熱烈討論中，有好多人都話洗米嫂有錢有樣有身材，仲要有埋才智，與其擔心小三走得一個又有第二個，何不瀟脫講再見，搵過個對自己一心一意嘅另一半呢？
依家咁睇，最後贏家可能都係屬於男方！
討論區熱話：傳Mandy終於心死與洗米華5年情玩完
其實講到要惡鬥小三，相信有唔少JM都會覺得 「與其要爭，不如比埋你！」，皆因香港女性向來獨立自主，雖然成日比人標籤做「港女」，但亦都係因為呢一份傲氣，令香港女性有天不怕，地不怕嘅瀟脫，離婚會比三姑六婆閒言閒語？「Sorry，I don't care！ 」
之前都有唔少JM都分享過對抗小三嘅故事，總括而言，香港女性面對小三有兩個致命弱點：
• 經濟問題
有唔少面對小三問題嘅JM最苦惱都係在於一個「錢」字，由於收入來源絕大部份都係來自老公，無論係搵得少過另一半，擔心難以支撐家庭開支，又甚至係全職媽媽，已經掉低公事包多年，要重新出發搵工賺錢，心理同生理都需要時間去適應，不過「馬死落地行」，有手有腳點都唔會餓死，而且法律上，另一半係要支付一定程度嘅贍養費，所以現實中或者唔係諗得咁難過，當然如果婚後可以保持經濟獨立，對女性嚟講都係種保障。
• 調節小朋友情緒
另一方面，JM最擔心嘅就係離婚後會影響小朋友情緒同成長，但其實兩公婆婚姻出現咗問題，小則貌合神離，大則日嘈夜嘈，小朋友總有一日都係會感覺到，呢個所謂「完整」嘅家庭又係咪對小朋友最好呢？所以講到尾，小朋友嘅心理質素先係最重要，適當地按小朋友嘅年紀作出相對嘅溝通，或者總好過勉強落去好。
如果可以完善地解決以上兩個大問題，其實揀個錫自己嘅生活方式又何妨呢？
入嚟討論區一齊傾下：傳Mandy終於心死與洗米華5年情玩完
