生咗之後好唔好分房瞓？表面上你有你嘅生活、我有我嘅忙碌，唔好阻到大家嘅休息時間，似乎係好事嚟架喎。錯！咪話他條媽媽唔教精大家，做人千祈唔好咁短視。BB需要半夜餵奶嘅日子總有盡頭，但兩公婆習慣咗分房瞓，關係就會漸行漸遠，到時就後悔莫及喇！
好記得有次碌forum，睇到有新手媽媽呻：豬隊友幫唔到手，有時真係寧願佢行埋一二邊唔好阻頭阻勢，等自己可以專心湊BB。有啲網友回應：唔使擔心，你獨自湊B嘅願望一定好快實現，成日咁嫌棄老公你估佢Feel唔到咩？一陣喺屋企得唔到溫暖，向外索求係時間問題啫。
說話係好難聽，不過又不無道理喎。BB出世大家重心落晒佢度好正常，但係唔好忘記，真正陪自己一世嘅係老公呀。
如果你話分房瞓唔係因為關係唔好，而係「老公聽日要返工，唔想BB嘈住佢」，一片好意為伴侶著想。但人本性就係得寸進尺，遲下老公愈嚟愈習慣自由身，反而怪你同BB阻佢私人生活架啦。大家有共識生個B出嚟，就唔會由一個人承擔晒所有囉！B你有份生，就有責任付出啦～
預咗畀人抨擊話我太偏激架啦。不過我都係要講一句肺腑之言：唔好因湊B嘅磨擦而放棄夫妻關係！
