龔sir,我同老公有層2房自住樓供左幾年,最近計過手頭資金剛好夠即時還晒尾數。我們見好像一次過還晒唔洗再俾利息銀行好似有著數,其實係唔係?如果唔一次過還晒,有冇其他選擇(我們有諗過買多一層3房,但係個價太癲所以放棄左)?Thanks。
個案重點:
- 擁自住物業
- ‧手頭現金夠即時清還尾數
重點目標:
- 應否一次過還錢
- 如不還錢,應如何運用資金
龔成老師分析:
如果你有一筆錢可以還,其實可以比較下「按息」同「投資回報」。
舉個簡單的例,如果你有$100萬現金,按揭利息我當2%,你將$100萬現金還錢,每年就可節省2%的利息。但如果你不還錢,將錢投資收息股,得到5%,就算每年要比2%息,你都有著數。
但這個策略都有風險,因為收息股的股價都會有上落,你有可能賺息蝕價,同埋,唔係每個人都想投資,又或想面對這些風險,所以,其實好睇你地自己。
至於將資金再買多一層樓,策略上有保留。因為我地要進行的,是一個平衡的財富組合分配,物業、股票都要有平衡,太過則重一邊都不是好事,如果你本身已有物業,再買多一個物業,就會令物業總你總財富的百份比過多,令你面對集中風險(除非你其他資產好)。
加上樓市不平,不用急於現時買樓。如果你不是自住,再買一層就是投資,那就應該比較不同投資工具的回報率,以投資角度分析邊樣值得投資,現時的物業,投資價值並不大。
所以,如果你有投資知識,可以不還錢將錢投資在收息股。但如果你無投資知識,將錢還都可以,但在理財上未必發揮得最好。
你亦可以考慮加翻個按揭高息戶,當中的現金可自動對沖欠款利息(但最多只可一半),這樣,就算你不還錢,將現金存於這裡,同時把握這段時間學習及尋找投資機會,都是一個方法。