過去一年幾,香港發生咗好大嘅變化,好多人嘅生活都被擾亂了,縱然如常咁返工同過日子,但大家都知道,香港有啲嘢係唔同咗。作為一個媽咪,即使唔理政治,但貼身影響小朋友嘅教育,想唔理都唔得。
最近教育界一連串嘅風波,相信令唔少家長都憂心:小朋友仲可唔可以喺思想同言論自由嘅環境學習同成長?身邊稍為有經濟條件而且有小朋友嘅朋友,好多都有離開香港嘅諗法,有啲甚至已經作出行動。我一家三口都好鍾意大自然,去過幾次澳洲玩露營車後,更係愛上當地嘅生活節奏同環境,但礙於經濟條件有限,專業技術又無乜,移民都只停留喺幻想階段,目前仍然要努力工作儲錢,希望為移民鋪路。
即使目前未能夠移民外國,喺香港我哋都想為仔仔提供好似生活喺外國咁嘅環境(當然係難,難都盡做啦~),另一方面努力儲錢同時裝備好仔仔。我仔仔就嚟4歲,剛讀K1,係超級大B一個,為咗慶祝佢返學,我買咗個書櫃畀佢,希望培養佢睇書嘅習慣(但暫時未見成效……)
成日聽講喺外國,藍領值錢過白領,裝部冷氣嘅人工,分分鐘等於部冷氣機價!想要喺外國生活,梗係要細細個開始裝備好自己啦!送書櫃嘅呢一日,仔仔就同爸爸一齊裝書櫃,都為媽咪慳返100蚊安裝費㗎!
話說回來,為仔女而要「人離他鄉」,到底又係咪最佳選擇?其實我都唔太肯定。但我只知道,我都已經諗唔到其他方法了。