三年抱兩係唔少人嘅願望，唔少父母都希望小朋友有個伴，可以從細互相陪伴之餘，將來更可以事事有商有量。不過，自從弟弟妹妹出世之後，大仔/大女好大機會覺得自己一直感受嘅愛被分薄，出現呷醋甚至行為倒退嘅問題。
近日有唔少媽媽都喺網上分享，話弟弟妹妹出世後，大仔/大女出現嘅反常行為。然而小朋友會否出現爭寵行為，多數取決於父母表現出來嘅態度，家長需要密切留意唔好掉以輕心呀！
「發晒脾氣話我們唔抱佢，話我們淨係抱妹妹。」
「我生完第2個，大仔反應都係好似覺得我哋唔理佢咁。」
「小朋友仲細，會呷醋唔奇，試下多啲俾佢幫手照顧妹妹。」
熱門討論：第二胎出世後，情緒好壞
引發爭寵成因導火線
-注意力由自己轉移到BB身上
引起小朋友爭寵嘅原因有好多，最常見係子女想得到爸爸媽媽嘅關注。本身子女係擁有百分百嘅關注，自從家庭多咗一位新成員，父母因而將愛同埋呵護分配俾其他兄弟姐妹而呷醋。
-時間分配不足
因為新生嬰兒哭鬧時間比教多，父母需要更多時間去照顧，從而得到更多陪伴時間。而大仔大女可能只擁有同枱食飯、沖涼時間。
-被認同時間減少
父母會經常氹BB 笑，一啲基本動作都會大動作地稱讚，令到大仔大女產生自卑感，覺得自己做得唔夠好而被忽略。
-出於害怕
擔心弟弟妹妹出世後，會失去原本喺屋企嘅地位、享有嘅權利同墊擁有嘅物品。
小朋友出現爭寵嘅特徵
-小朋友睇到BB 用喊嘅方法去取得父母關注，就會開始有樣學樣用哭鬧方式嚟表達自己。
-莫名其妙咁發脾氣。
-會直接口頭表達不滿，例如：「唔鐘意弟弟妹妹」、「爸爸媽咪依家唔理我」、「唔要弟弟妹妹」。
-會因為BB一啲行為，例如亂掉玩具而向父母告狀。
-偷偷打弟弟妹妹。
-搶弟弟妹妹玩具或物品。
-出現行為倒退，例如小朋友原本已經識自行大小便，但退回需要包尿片嘅狀態。
如何解決爭寵問題
1. 喺弟弟妹妹出世前，提早向小朋友介紹BB即將來臨，解釋一下懷孕過程，告知佢哋都係一樣咁樣喺媽媽肚入面成長，亦可以帶同小朋友一齊準備嬰兒用品，期間稱讚佢地「好體貼喎」、「好乖呀，多謝你。」、「BB 好多謝哥哥/家姐呀」，從而令佢哋享受過程亦期待BB嘅出世。
2. 媽媽忙住照顧新生BB 時，可以由爸爸陪伴小孩子，不至於覺得父母都被搶走。
3. 如果係單親爸爸或媽媽，可以請其他家人幫忙，避免忽略小朋友嘅照顧。又或者可以為小朋友準備一個玩具，將玩具比喻為BB，俾佢地一同參與照顧嬰兒嘅過程，趁機會解釋BB 仲細，無能力照顧自己，長大後就可以似哥哥姐姐咁叻自己食飯，從而提升佢地自信。
4. 為小朋友準備個別同家長獨處嘅時間，例如一齊沖涼、臨訓讀故事書。
5. 大讓小嘅觀念唔見得正確，家長可利用稱讚嘅方式，灌輸雙方養成禮讓嘅觀念。
