唔知大家仲記唔記得初嚐同另一半去旅行係幾時？特別作為女仔嘅你，又有無試過瞞住阿媽偷偷地拍拖，仲要借朋友過橋，呃阿媽話去女仔朋友屋企玩，事實就走咗去男朋友屋企過夜？直至幾多歲，你先坦坦白白同你雙親講，呢啲全部係美麗謊言？
話說Juicy媽今日就睇到有位JM喺forum大吐苦水，話啱啱收到阿囡「通知」，將要同男朋友齊齊去旅行，呢位JM簡直係嬲都震，覺得阿囡咁做會身陷「失身危機」，仲問大家會唔會阻止佢哋去，而重點係事件中嘅女主角已經22歲，所以大家都幾一面倒，覺得阿囡已經係成年人，邊有話仲可以唔畀佢去：「她都成年人啦 ? 你別管太多啦 ? 年輕人的世界。」、「22歲，無得嬲無得管啦！ 」、「性教育係由細灌輸，你做左幾多，依家收成幾多 」
咁又真係嘅，不竟囡囡都已經22歲，但作為父母無論囝囡幾多歲，點都搵到啲嘢擔心下，所以呢份心情又明白喎，假設真係「搞出人命」，女方確係有更多嘢需要承受，所以講到呢度，各位都覺得已經唔係去旅行嘅問題，而係應該及早教育強健思維，從小灌輸正確嘅性教育，等子女都明白事情嘅嚴重性，如果唔想咁早放低書包，升級做人父母，就應該好好為自己行為負責。
