家長憂幼兒認字能力差 網民：其他能力同樣重要，過於催谷認字會有反效果！

最近喺網上討論區見到有媽媽憂心3歲小朋友仲未認讀到A至Z，會唔會有機會發展遲緩？睇完不禁感歎，身處香港呢個競爭激烈嘅社會，我哋就快忘記一個正常小朋友發展里程應該係點啦⋯⋯其實3歲學認字仲好早，或者話3歲小朋友未認到字係好正常。

熱門討論：3歲仔認字能力

熱門討論：3歲仔認字能力

如果對幼兒發展里程稍作研究，就會發現係比較少有認字呢一環！例如教育局《學前兒童的成長發展：二至六歲兒童的發展特徵》同埋衛生署兒童發展單張。參考以上資料，就會知道比起識幾多隻字，家長應更留意幼兒語言理解、語言表達同情意發展。講真就算小朋友去幼稚園面試，都好少考認字（都未開始返學！）。反而小朋友表達、社交同認知能力就好重要，令小朋友可以流暢對答，理解問題同表達自己。另外，培養自信心同禮貌都不能夠忽視。

亦有網民認為文字較為抽象，小朋友難以掌握係好正常！千祈唔好因為急於求成而太迫小朋友，萬一小朋友覺得煩厭，將來就會更抗拒。小朋友返學後自然會學習認字，但如果家長想及早培養小朋友對文字嘅興趣，只要唔過份催谷其實都係好事。以下收集咗網民一啲有趣方法，大家不妨一同參詳吓：

1. 屋企當眼處貼上文字圖卡，增加小朋友接觸機會同好奇心。


2. 「1」係鉛筆，「2」係鴨仔，同小朋友一齊發揮想像力！


3. 利用兒歌，一邊睇片一邊唱A至Z。


4. 搓泥膠搓出簡單數字或字母。