好多媽媽都覺得，無論湊仔定湊女，咪又一樣係咁湊，不過早兩日見到討論區有人傾教養男孩心得，即刻被點醒，原來湊仔同湊女喺教養方式上可以有好大分別！因為香港嘅家庭模式，好多時爸爸都要出去工作，又或者相對比較少時間同囝囝相處，囝囝通常都由媽媽、嫲嫲、婆婆、工人姐姐呢啲女人照顧下成長，原來真係會學少咗啲嘢！
5個教養男孩不可忽略的要點：
1. 男廁女廁問題
2. 培養表達能力
3. 為囝囝找到興趣
4. 培養責任心
5. 爸爸的陪伴最重要！
樓主大女今年考小一，作為媽媽嘅佢深深感受到競爭激烈，所以想早啲開始為緊PN嘅細仔做好準備，所以以「請教各位前輩教養男孩既心得」開Post，引發大家論邊類玩具、書籍適合男仔。其中有唔少媽媽都話，「識好多都係大女容易然後細仔艱難」，究竟點解會咁架呢？再睇多幾個留言，發現原來同教養方式、爸爸陪伴嘅時間好有關係！以下整合咗5個教養男孩一定要注意嘅要點：
1. 男廁女廁問題
好多家長都忽略咗留意呢一點，以為小朋友仲細就唔識或者唔記得，所以成日諗住既然阿仔痴媽媽多啲，咁就跟媽媽入女廁／女更衣室啦！但其實，好多小朋友喺幼稚園已經學識男女有別嘅概念，成日入異性廁所，可能會令佢哋心入面嗰條男女有別嘅線變得模糊。仲有，試諗吓，如果爸爸帶5歲囡囡入男廁，作為媽媽會唔會覺得有少少擔心？調返轉諗，其實都一樣，所以湊仔出街，最最最好都係由爸爸帶去男廁！
2. 培養表達能力
有留言指，「好多囝囝學術唔差，但粵普英表達／口述能力差啲。」呢方面可能同一屋都係女性照顧者有關，好多時媽媽、嫲嫲、婆婆、工人姐姐等都習慣一輪嘴咁講嘢，好少俾機會阿仔表達自己嘅意見，確實就算比着係爸爸，對住咁多個女人把口，都寧願講少兩句啦！所以建議樓主如果想幫阿仔預備考小一，不妨重點培養阿仔嘅禮貌、自信心同埋表達能力，平日講少兩句，多啲聽吓囝囝嘅諗法，鼓勵爸爸多啲同阿仔嚟個boys’ talk傾吓男仔心事。
3. 為囝囝找到興趣
千祈唔好覺得男仔就一定只愛玩車、砌模型或者做運動！無論男仔定女仔，其實個個都有獨特性格，有啲家長一見到男仔玩煮飯仔就會阻止，但其實咁樣事先性別定型咗阿仔，反而會阻礙佢發展，細個嘅時候，最好各式各樣嘅活動都俾阿仔試，積木、玩具車、畫畫、閱讀、踩單車、做手工等，樣樣都俾阿仔試。如果留意到佢對某類事物有興趣，再特別培養，例如鐘意動物，就買多啲動物書、睇動物片，再做啲創作性活動，畫畫、手工咁，最緊要幫阿仔搵到興趣同埋專長！
4. 培養責任心
樓主有個大女，而通常有家姐嘅細佬，因為由細到大習慣被照顧周到，所以獨立能力同責任心都會爭啲。有網民建議樓主考慮教阿仔做家務，有助訓練手眼腦協調、安排工作分配，同埋為人服務嘅心志。
仲有另一位網友都有好獨特嘅見解，佢建議樓主多啲同阿仔講佢身邊所有人嘅優點，等阿仔可以潛移默化咁學識嗰啲優點，例如樓主可以讚吓爸爸幫手摺衫好有責任感，慢慢阿仔就會將呢啲聽返嚟嘅優點全單保留喺自己身上，直到長大都唔會消失，養成暖男絕對不是夢！
5. 爸爸的陪伴最重要！
講到尾，喺陪伴男孩子長大嘅過程中，爸爸嘅角色都係不可或缺，阿仔將來會成為點樣嘅男人，其實好視乎爸爸同佢相處嘅時間有幾多！社工都話，爸爸陪伴孩子嘅時間愈多，孩子喺語言、社交、大小肌肉等各方面都會有更好嘅發展！所以，各位爸爸媽媽，想教好阿仔，一定要一齊陪伴佢成長！
