有家長食自助餐時遇上一班「極品怪獸家長」！
嗰位家長近日喺網上討論區話，趁放假同屋企人去酒店食自助餐，附近有張枱坐咗大約12、13個成年人同11個BB。食食吓，嗰班怪獸家長同酒店職員嘈，其中一位女士自稱成日幫襯嗰間酒店，話佢哋有兩個BB生日，要求酒店送兩個蛋糕幫BB慶祝。酒店職員先道歉，再好有禮貌咁表明公司冇生日優惠，亦冇送蛋糕優惠。點知，班怪獸家長面皮厚過地殼，再有另外一女一男先後大大聲話要投訴職員啲服務態度唔掂，話職員一句對唔住就想推咗客人要求，搞到職員眼紅紅。最後，經理出面調停，竟然真係送咗兩個蛋糕畀班「怪獸家長」打包拎走……
好多網友睇完呢班極品怪獸家長嘅行為，都怒斥佢哋Cheap到爆，甚至冇資格做人父母！明明自助餐已經有精緻甜品蛋糕任食，但佢哋嫌自助餐枱嗰啲已經切好晒，竟然要人喺廚房攞兩個未切嘅出嚟送畀佢哋，而且有錢食自助餐但竟然冇錢買蛋糕？真係超級核突！唔少網友留言鬧佢哋簡直影衰香港人，亦喺仔女面前做咗壞榜樣，擔心佢哋教出嚟嘅仔女只會變成一堆「有公主病無公主命」嘅貪小便宜之人！
有網民認為酒店經理唔應該屈服，否則只會助長呢種無賴，令佢哋變本加厲，繼續喺其他地方用投訴嘅方法換取利益。不過，其他家長就覺得，職員同經理都只係打份工，為咗息事寧人，讓步都好正常。
嗱，亦都有網民「讚」呢班怪獸家長咁都做得出係真心勁。正所謂「人若無恥，天下無敵」，佢哋又真係面皮厚到世間罕有，Juicy媽都不得不寫個「服」字畀佢哋。
不過，講到教仔，Juicy媽一向都堅持身教。小朋友會學足父母嘅一舉一動，所以我一直都努力做好榜樣，過馬路唔衝紅燈、搭車會讓座畀有孕婦或老人家等等。除咗呢啲小小公民意識，大是大非亦同樣重要，如果Juicy媽係嗰位酒店經理，旣然道理喺我哋呢邊，我一定會據理力爭，撐嗰個全程保持禮貌嘅小職員，點都唔會向班怪獸家長妥協，最多咪報警！哼！
即刻Click入討論區一齊傾
