2018-03-16

2.6K

姊妹同房會培養感情,抑或增加拗撬?

小朋友愈黎愈大,裝修時考慮嘅問題就愈多。有討論區網民就話近日有意裝修,想兩姊妹同房,等佢哋可以由細培養感情;但網民老公就覺得應該有自己私人空間。

 

根據呢位網民形容,家中約400呎,兩夫妻加兩個女仲有工人姐姐。佢就想大房畀兩姊妹Share,細房工人姐姐瞓;但老公就認為應該設計兩間大小一樣嘅房,小學階段暫時兩姊妹一間房,到將來唔再請工人就分返一人一房。

 

有網民支持樓主,因為兩姊妹同一個空間生活,學識互相遷就,感情都會好啲;部分網民都支持一人一房的意見,仲講出自己要同兄弟姊妹同房的心聲,例如作息時間不同影響對方休息、到咗中學有少男少女心事想講下電話都十分唔方便。仲提到「感情好唔好唔關係咪住同房嘅事」有個人空間,仲反而少啲爭執!

 

我就最認同傾電話唔方便呢個point喇!仲記得細個無自己房,要同朋友仔傾電話要焗喺被入面講…怕被屋企人聽見!不過喺無嗌交嘅晚上,同家姐上下格床咁pillow talk,都仍然令我好懷念…如果可以就最好一人一間房,間唔中兩姊妹一齊瞓,有自己小天地相信可以免卻爭執,又可以keep住姊妹感情!

 

相關討論:http://bit.ly/2pb6j7v

 

【編按:以上內容為作者之個人意見及立場】

相關文章

【跟住小編做媽咪】照顧1歲BB辛酸 小編掙扎︰唔報N班真係得?

【誤吞電池】女嬰進食時疑似鯁喉 求醫後揭誤吞電池燒穿食道

【兒童健康】小朋友發燒點算好?一文看清兒童發燒原因+迷思+照顧方法!

【兒童健康】腸病毒疫情升溫 營養師教5招提升免疫力助身體快速恢復

緊貼新冠肺炎最新相關資訊