2019-11-29

2.1K

【親子好去處】菠蘿園 近距離親親草泥馬

草泥馬相信係好多大小朋友好鍾意的動物,不過好多時都要去台灣或者日本等地方先可以見到,但係依家留喺香港就可以見到佢哋啦!

好多年前都曾經到過「有機薈低碳農莊」,不過後來佢改咗名叫「菠蘿園」我都未去過,最近知道佢哋引入咗羊駝(即草泥馬),令我哋再次到農莊玩。

除咗有今次主打的草泥馬撐場,農莊都仲有其他遊樂設施,值得一家大細去玩番日。

入場費大人價$100,小童$80;餵飼草泥馬每位$60/20分鐘(包飼料);農莊設有小食、精品及玩樂遊戲區,需另收費。

一大早我哋就搭西鐵到錦上路。

只要沿A出口直行至行人隧道。

穿過行人隧道後見「四排石」路牌轉咗直行就到菠蘿園了。

穿過這條菠蘿小徑。

沿路有好多個用車軚砌成的菠蘿擺設。

但係上面的係真菠蘿苗。

入場前先登記買票。(不過如果唔見職員,就可以直接進入到士多位置購買入場票。)

大大個菠蘿羊標記,因為除咗菠蘿,呢度仲有羊羊架!

一入去左手邊就會見到羊同兔欄。

我哋一大兩小入場($100+$80x2)$260,另外入場餵飼羊駝($60x3)$180,大人送一個許願牌,小朋友得到各一幅沙畫同埋各2枚代幣可以夾公仔,仲有2張紙羊駝摺紙模型。

經過士多轉右,直行穿過沙池、充氣彈床,就會到羊駝圈。

好興奮又緊張呀!離遠見到羊駝啦!

其實唔買飛的朋友都可以在圈外同羊駝影相,不過我就梗係想入去近距離親親羊駝啦!

本來$60有20分鐘,我都覺得價錢還合理啦,但係餵餵下發現原來會再繼續入客,好多人爭住一切餵,我就覺得唔太值喇!(好在我早到,所以都仲可以包場咁影,只係最尾5分鐘先有其他遊客)

入場前職員要我哋放腳入去洗一洗個鞋底。

現場有3隻白色,一隻啡色的羊駝,真係好得意喔~

啡色呢隻就真係好似駱駝。佢哋好似好肚餓,好快就食哂芊芊手上的草。

哥哥好大膽可以好近距離咁餵,相反芊芊就邊餵邊驚。

後尾發現佢哋真係好純好乖好可愛,就慢慢越行越近。

羊駝身上的毛仲好好摸,摸上去好似張羊毛被咁,好彈手!羊駝任影唔嬲,雖然每位入場$60只有20分鐘,不過都確係幾足夠。仲可以超級無敵近咁影佢哋。

不過之後越嚟越多人入埋嚟一齊餵,影相就開始有D難度,但好在我哋大部份時間都冇人。最後我連自己嗰份草都俾埋佢哋餵。臨走前再同老友打番張咭,希望下次有機會再見。

最重要的羊駝環節就玩完喇,其他時間我哋就在農莊慢慢玩打吓咭咁。

雖然農莊節目唔算好豐富,不過人少的時侯留在大自然,都係一件感輕鬆的事。

仲記得好多年前仲係HelloKitty主題農莊的時侯,喺呢度影過張相。相隔五年同一地方再影多張相,不過少咗媽咪噢...(呢張相由芊芊影,都幾好喔~)

菠蘿園內有多個兒童遊樂設施地點,其中最大算係呢個位置。除咗一大片草地,仲有好多款唔同的韆鞦,喂~你哋兩個好似調轉咗坐喎。

咁多款遊樂設施,唔單止玩得,用嚟打咭都唔錯。

呢條花圈路好適合作婚禮用。

除咗農莊門外,呢度都有一個許願牆,可以將頭先的許願牌掛上去。

入場時會派每人一張地圖,在農莊四圍都有印章區,只要集齊印章,就可以去士多換禮品。

呢個彈床係免費玩的,兩個玩到喪哂!

旁邊有個玩樂套票遊戲區,呢度就要另外收費,每位$20 (假期$40) 只可以玩20分鐘,內有3個項目,充氣堡壘、釣魚同彩沙池。充氣堡壘唔算大,不過都夠哂佢哋兩個玩。

自己要睇住時間,差唔多就叫佢哋去試玩第二樣,哈哈~最唔鍾意咁樣要計住計住。不過職員都態度好好,而且今日人少少,當自己VIP包場玩就冇所謂啦!

兩個鬥釣得多,估唔到佢哋兩個好鍾意玩,仲釣到成個筒都裝唔哂。

我估職員都俾我哋玩多咗一陣,之後我哋就去咗親親小白兔。真係好得意呀~如果可以摸到佢哋就好喇。

餵完兔仔就餵羊仔!本來都要用$20先可以買餵料餵,不過見成地都係,就咁執番上嚟餵都夠哂多。

我欣賞呢度都好多洗手盆,家長可以好放心小朋友每次餵完小動物,或者捉摸完羊駝等,就可以立即洗到手好方便。

之後都係時侯休息一下,芊芊買咗菠蘿冰條 $20。

哥哥就叫咗個雪糕菠蘿包套餐 $60。

賣相好正,味道都OK呀!最好係支菠蘿飲品,用上bless冷壓果汁。

之後我哋拎番入場時送的沙畫出嚟玩,同埋4個代幣去夾公仔。

由於今次農莊主題係羊駝,所以夾公仔機內的都係Cute Cute的羊駝公仔。士多內仲有好多菠蘿飲品同羊駝精品賣。

我同哥哥畫埋許願牌,掛埋上棵樹上面。

跟住就番去沙池玩,呢度都唔需要另付費,入場費已包。原來沙池都係菠蘿造型。兩個盡情在沙池打波。

玩咗大半日可以話真的玩得盡情。

【編按:以上內容為作者之個人意見及立場】

相關文章

【身心動力】富通保險呈獻:躍在維港#PowerUp 全港首個海上遊樂場 為每個家庭注入身心動力

【牙科保健】愛吃甜食但不想蛀牙?家庭牙醫有辦法!

家長煩惱:小朋友上學不願喝水 網民提創意方法

【營養師話你知】小朋友經常「大頭蝦」點算好?

緊貼新冠肺炎最新相關資訊