有睇開楠媽嘅page嘅媽媽都知道楠媽係一位在職媽媽。我同各位在職媽媽一樣，朝9晚6，講真放工真係幾累，累到一個點。還要在lunch time去買新鮮食材，研究手指食物食譜。回家後立即9秒9準備，真的好累人。但大家為咗BB好，幾累都值得，相信無論全職定在職媽媽都一樣。
究竟在職楠媽點樣行BLW呢？
大家最關心相信係BB會唔會噎親。老實講，我初初都好驚架。但睇書講，只要行正統嘅BLW，不是半BLW，BB噎親嘅風險幾乎少於傳統餵食嘅BB，呢個係我一直堅持嘅原因。點解呢？
因為BLW嘅BB食嘅食材是由大到小，由原身食材：例如整條皇帝蕉、菜心莖，到肉類飯波麵條，到可自行「不」麥皮、飯等。BB先學識咀嚼，從而慢慢懂得咀嚼到適合大小才吞。（過程都幾驚心，遲d再講）
而傳統餵食嘅BB嘅食物係由小到大，先由幼滑既米糊，到粥仔，引進手指食物（finger food)，再進化到大人飯。BB會先學吞，再慢慢接受有d食物要咀嚼，愈來愈大件去適應。可見兩個係完全相反過程。
緊記！BLW不是用手食嘅意思，係一個由BB主導嘅戒奶過程！以楠哥爲例，佢未夠11個月左右已經3固1奶，奶量一直下降。這個是主導戒奶好明顯嘅証明。沒有強迫，完全自主。
如果一開始就混合(所謂半BLW)有甚麼後果呢？傳統餵食嘅BB由於太習慣吞食流質野，如果不是依傳統餵食嘅過程去做，突然一餐流質，突然一餐BLW比原件食物佢食，佢就會整件吞，呢個時候，大家最擔心嘅事就發生了，會噎親。
至於BLW嘅BB，佢地已習慣咀嚼，而且自己會分辨適合嘅大小，噎親嘅風險自然減到最低。但壞處係，有機會很久很久也替代唔到一餐，各個BB嘅進度不同，沒有比較，只有BB自己嘅時間表，媽媽要有心理準備長期抗爭。
所以我再長氣講多次，為咗你地BB著想，不要半BLW（也不要教人半BLW，你的BB不等於別人的BB，我們應從最安全嘅方法著手），這是兩個大相徑庭嘅斷奶過程。
知而行難，當你決定要行BLW，實行嘅時候點都要刻服每個人都擔心嘅心理關口。楠媽都唔例外，除咗擔心外還是擔心。
為咗自己可以監察住楠哥，楠媽嘅做法係由晚餐開始，因為我地放工都已經係晚餐（在職媽媽嘅悲哀……）當晚餐可替代嘅時候，就進展到午餐，午餐都可以嘅時候就到早餐。
最初試可以奶後進行，因為BB飽嘅時候心情較好，我最初畀入門食物菜心莖、香蕉、牛油果，每樣都食幾天，以防出現敏感又追不了源頭。不要心急，此階段BB絕屬玩樂性質（6個月大bb乜都放入口）。過了兩、三星期，見到佢開始食到了，我就改做先飲2/3奶就進行BLW。如此類推，到最後，就把心一橫不喝奶就直接來。我好記得那天是星期六的下午。7個多月，楠哥終於代到一餐了！（待續）
成功代餐嘅一天，7m9d，無牙仔嘅楠哥。
相關閱讀：
【楠哥BLW二三事】BLW小知識-Gagging vs Choking
