「唔好攪呀，姐姐鬧㗎！」
「再嘈司機叔叔掉你落車架喇！」
早幾日Forum有人開Post話覺得「唔好攪呀，姐姐鬧㗎！」呢類說話難聽過粗口，樓主以前做過零售，經常有家長教仔女時拖埋佢落水，令佢覺得好反感：「點解要屈我？我冇鬧小朋友。」佢覺得家長應該直接向小朋友指出件事本身係錯，而唔係用後果「其他人會唔高興」嚟恐嚇佢。
Juicy媽覺得樓主都幾有道理，家長教仔時用個陌生人嚟恐嚇細路，以為可以嚇窒小朋友唔敢再犯，但有網民覺得句嘢成個價值觀放錯重點，如果因為姐姐會鬧，所以唔應該攪人哋啲嘢，咁係咪即係姐姐見唔到或者唔會鬧就可以攪？
亦有網友突破盲腸，話句說話本身冇指出件事係啱定錯，意思彷彿「其實阿媽就冇所謂嘅！不過人哋唔鐘意咋！」咁咪變相冇灌輸到正確價值觀畀小朋友囉……？
不過，有網民就認為，其實大人行街都會掂舖頭啲嘢啦，小朋友好奇伸手摸都係人之常情，「摸一摸」呢件事本身冇錯嘅。Juicy媽就覺得，摸唔摸得呢個問題要睇好多因素嘅，但今次討論嘅重點應該擺喺父母教仔嘅表達方式度，而唔係討論個別做法啱定錯。
圖片來源：謝曬皮 Facebook
「你唔努力讀書，就好似個姐姐咁做收銀架喇！」
「你唔乖，我打畀校長架！」
好多爸爸媽媽都鍾意用呢類說話嚟教小朋友，本地插畫家謝曬皮都出過Post講佢有次搭車，隔離有個阿媽借佢過橋鬧小朋友：「你咁曳，姐姐笑你喇！」呢個教育方式，可能係想利用第三者或者群眾壓力令小朋友覺得羞恥，或者真係可以立即見效，但只係一時三刻，當「人哋」行開咗，小朋友又會重蹈覆轍。而且呢個方法係拖咗無辜嘅第三者落水，令人哋「躺着也中槍」……
有心水清嘅網友就話，教小朋友係應該係教佢一件事嘅本質啱定錯，而唔係淨係用個後果嚟恐嚇佢。確實又真係，自己的孩子應該自己教，人哋冇義務幫你做醜人「教仔」……又或者，某啲情況，就算拖人落水都可以換個講法話「你再咁曳，撞到姐姐喇！」等小朋友明白唔可以做嗰件事係因為會影響到其他人，等佢學識為他人着想。
