第二日行程之一，我哋去咗浦添市 Blue Seal 總店的 Ice Park 裝飾雪糕體驗。呢個活動係一個親子活動，亦可以係情侶拍拖好活動之一。
入到 Blue Seal 總店，已經好興奮！去到 Ice Park 部份直情好想尖叫，因為有一陣好強烈嘅少女味!! 因為裝潢全部都係用咗 Baby 色系，Baby Pink、Baby Blue…好靚呀!!
日本真係好多呢種小機械人，仲可以按掣同佢Selfie，佢會擺Pose，超搞笑呀!!
出發Ice Park前記得預先到網上預約，而每日只有5個場次，費用¥1000/位，而每位10歲以下小童可由1位家長陪同入場，即一個家庭¥2000就可以參與製作。
場次：10:30AM、2PM、4PM、6PM、8PM
預約：於官網 http://icepark.blueseal.co.jp 右上方「体験予約 Reserve」，就會出現預約情況日期。
到達現場，先到詢問處 (Information) 出示預約證明作登記並付款，完成登記手續就可以進入工作坊了。工作台下面每人有兩格儲物櫃，可放手袋，而台上會有工作盤。
安頓好之後，職員會派發點單紙及草稿紙。大大張嘅係說明書，日本人超窩心，說明書共有日文、英文及中文版。
和牛B同爸爸正在點菜，要咩形狀嘅雪條 (貓頭、心形、哈哈笑) ? 要邊一種口味嘅雪糕呢？外層脆皮又要咩口味? 要邊一隻色嘅朱古力筆？仲有雪條上面嘅裝飾呢。
填寫好點單紙之後，就要去清潔雙手，再開始進行製作。
所有裝飾配料都已經準備好，待職員安排次序就可以出嚟攞。
職員姐姐開始介紹同埋講解製作方法。
三位小朋友到底有冇專心聽書呢? 其實…都唔會聽得明，因為姐姐係講日文嘅。當下令我感到好恩惠，因為和牛B問我「媽咪，姐姐講咩呀？」。
講解過後，會輪流守秩序排隊領取裝飾用料及食材。未輪到我哋，咁我哋可以用草稿紙起稿設計好雪條。
終於到我哋呢台去領食材啦~~大個女當然要自己試下拎住食物盤去拎食材啦~
依照自己圈嘅材料去拎，不過有啲材料已經冇晒啦，唯有轉裝飾配料啦。
最後，由職員姐姐幫我哋拎出成支雪條嘅靈魂，就係有圖形嘅雪糕啦!!!!
爸爸揀咗朱古力味嘅哈哈笑雪糕。
拎好所有食材，馬上要返回位子上開始製作啦!! 因為製作時間只有5分鐘，太耐嘅話雪糕會溶!!
職員會幫我哋拎我哋揀好嘅脆皮漿，我係揀左雲呢嗱雪糕，士多啤梨脆皮漿。將成個雪糕浸入去，然後拎起數秒唔再滴就可以開始裝飾啦!!
爸爸同和牛B一齊製作一齊裝飾。
好有成功感嘅和牛B。
和牛B一整完，就已經好想食啦。
日本人真係超窩心超細心!! 提供左一個拉鏈保溫袋，再附上一舊乾冰，透明包裝盒 (放雪條) 再有一個靚靚嘅包裝盒。
完成雪條後，可以排隊自己斟雲呢嗱味軟雪糕。
雪糕仲可以揀杯裝或甜筒添呀!! 斟好雪糕，可以利用用剩嘅裝飾食材，裝飾埋杯軟雪糕。
必到影相位
夏日少女風味嘅裝飾場景，雪糕、雪條呀
仲有雪糕甜筒杯款式嘅餐櫈，真係好可愛、好少女!!
總店
有留意過Blue Seal的分店都略有不同，總店有種懷舊美國風。
雪糕口味超級多!! 仲好Colorful，真係好吸引!!
仲有其他Blue Seal雪糕商品，家庭裝雪糕、杯子雪糕等。
Blue Seal 紀念商品，有小毛巾、橡筋、文具等。
Blue Seal歷史館
Blue Seal喺日本有好多年歷史，亦係沖繩嘅大品牌雪糕，所以行到邊都會見到Blue Seal。
免費停車場
沖繩機基本上好多免費 (無料) 停車場，Blue Seal門口有停車場仲要係免費嘅。唔似香港咁想泊低架車慢慢嘆杯雪糕都難，仲要停車場費唔平。
Blue Seal - Ice Park
地址：沖繩県浦添市牧港5-5-6 (牧港總店)
營業時間：10am-9pm
體驗：10:30AM、2PM、4PM、6PM、8PM（每天提供五個場次）
費用：¥1000/位
官網：http://icepark.blueseal.co.jp
