最近頻頻有機會做飛車黨，各大商場都有小賽道俾小朋友一嘗做小車手的心願！今次到數碼港The Arcade小車手嘉年華，除咗慶祝復活蛋有得玩掘蛋遊戲之外，仲有得參加小車手計時賽，而且仲有超多懷舊攤位遊戲同其他活動，玩足成日都玩唔哂！去數碼港其實有好多方法，起初以為得鰂魚涌或者中環轉乘巴士兩個途徑，原來一Check之下發現屋企附近有巴士(970)可以直達(當然比較耐...) 但係其實如果到中環轉乘巴士計埋步行都係差不多時間。
一進入商場就先被這個由Wonderland設計的充氣賽道所吸引，真係想快D可以落場玩！
一話影相兩個就自動行埋去搵自己鍾意顏色的方程式賽車。
一如我所料，芊芊玩掉彩虹就好似倒錢落海咁，我一切期望就唯有放在哥哥身上，加油呀！佢哋兩個分別掉中紅色(但係擲咗少少界)，但職員哥哥超好人，照俾番份小小禮物佢哋
2位單純的細路，以為自己好利害，啱啱開始玩就已經可以贏到獎品。
為咗唔打擊你哋嘅信心，個秘密等你哋18歲先至話番俾你哋知啦...
掉中哂3隻獅子公仔可以得8個印(指定數量印花可以換到Little Adventures不同大小的可愛動物毛公仔)。
這個專區需要5個遊戲點數，一入場就獲職員送我哋兩隻馬騮公仔！跟住見到一大個屏幕投射海底的影像，原來呢個叫「海底水族館」，小朋友將佢哋完成嘅畫作經掃描器一讀，自己的畫作就會即時進入畫面
呀妹先完成就去將畫作交俾職員哥哥去掃描！
搵到啦，兩個分別搵到自己畫嘅魚同蟹，估唔到呢個小活動可以令佢哋咁開心！
小朋友學嘢特別快，我哋冇理會佢點樣先可以掉得中，芊芊自己發現彈一下枱入碗係容易D，所以有陣時真係唔駛特別限制小朋友的創意。
玩完攤位遊戲我哋上到大草地平台，原來呢度又有好多嘢玩，點算呀！玩極都仲有嘅？
彈床後面有個碰碰車遊戲區，大人細路都可以一齊玩！
我哋先入場聽職員哥哥講解守則，戴上頭盔着齊裝備...
呀劍評分: 10分
呀劍評語: 對好多無車朋友嚟講，聽到數碼港可能都會話好遠，唔想山長水遠去玩一個商場節日活動，但係其實要上嚟一D都唔難仲好快，而且今次活動真係好玩，亦係平民價錢！玩完仲可以喺度食埋嘢睇多場戲先番屋企都仲得！
數碼港商場x Wonderland－「GT小車手嘉年華」 簡介
打造全港首個「戶外兒童電動GT賽車競技場」 同場設獵蛋尋寶、創意數碼水族館、童樂碰碰車、奇趣保齡球、反斗充氣彈彈跳，超過10個經典攤位遊戲贏取豐富獎品歡渡開心假期
數碼港商場 x Wonderland「GT小車手嘉年華」 (已完結)
日期：2017年4月14日至2017年4月17日 (共4天)
時間：上午 10 時至下午7時
地點：數碼港商場L2全天候廣場及 數碼港2 座4樓數碼廣場
票價：遊戲證$200 (包含15個遊戲點數)
活動查詢：2376 4978
