黃埔「九號水產」呢個月舉行日本美食節，除咗食同購物外，當中特別想為大家介紹場內嘅「私廚教室」，請來親子活動機構「果子夢」導師，於周末周日開設親子滋味班，教授烹調日式帆立貝菜式。
我同囝囝囡囡，率先參加試玩活動，製作帆立貝螺絲粉沙律。過程中，兩兄妹都好投入，好認真。製作一個沙律，對於大人來說，好簡單好容易，主要都係切切撈撈。不過對於小朋友來說，單是切食物已經係一個大挑戰，我睇住佢哋用刀，擔心佢哋會受傷，而爸爸就叫我放鬆一點，讓佢哋慢慢嘗試同學習。當佢哋成功完成任務，臉上都帶著滿足嘅笑容。
「作品」製成後，大家都食到唔停口，自己親手整出來嘅食物，特別好味。一邊食，導師一邊邀請每個家庭分享烹飪過程嘅感受。呢次烹飪，我好欣賞兩兄妹能夠分工合作，互相幫忙。哥哥主要負責走來走去拿材料、切食材，妹妹就負責安排食材份量同混合。而佢哋亦懂得感謝我同爸爸抽空帶佢哋去玩呢。
最後，簡單介紹一下「果子夢」啦，佢係一個親子活動機構，定期會舉辦親子活動，例如郊遊、生態導賞、親子廚房等，透過各種體驗活動，讓家長陪伴小朋友經歷及成長。有興趣的話，不妨留意一下佢哋呀。
「帆立貝親子滋味班」詳情
日期：9月14, 15, 21, 22, 28, 29日
地點：黃埔九號水產
費用：全免
更多資料請參考「果子．夢（結伴同遊）」Facebook 專頁
