今次已經係第三次帶著小B去旅行，
隨著小JM既長大，要帶既隨身物開始已經慢慢變得少左。
出街都變得輕鬆左，之但係去旅行又會係另一回事，
媽媽都總會擔心「帶唔夠」或者「帶漏左」！
為左避免「帶唔夠」或者「帶漏左」既情況，
所以我之前已經整左一份幫BB旅行用品清單，
大家只要Click一下就可以下載架啦。
今次同以往有少少唔同，
唔講衫、褲、鞋、襪，
唔講用品，唔講食物，
我地講－旅行平安藥包！
好多時旅行我地都會諗起要執啲咩衫、咩用品咁，
少不免就會忽略左要帶一個小小既「平安藥包」來傍身。
你要知道，當人在外地而又一個唔好彩病病豬既話都真係幾慘架，
又要唔知邊度有醫生，又要怕醫藥費用貴，
所以帶備定一個小小既「平安藥包」用來看門口都係必須既，
俗語都有話： 防範於未然 呀嘛～
特別係帶著小B去旅行，我地更加要為小B預早拎定啲旅行用既平安藥。
小B用平安藥：
通常去旅行前我地都會帶小JM見一見家庭醫，
叫醫生為小JM開定一啲「平安藥」帶去旅行，
以備不時之需，當然最理想就緊係唔需要用到啦，
真係touchwood，有需要用起上來個陣都唔會擔心搵唔到醫生先啦嘛。
我地既家庭醫生多數會開以下呢幾種藥：
- 鼻水鼻塞
- 止咳化痰
- 止嘔
- 止痾
- 退燒
大人用平安藥： 
1.）感冒藥：
同地區會有日夜溫差轉變，
而且又係冷氣地方出入，少不免就會好容易患上傷風感冒，
所以帶定以備不時之需。
溫馨小提示：
－要多注意保暖，以防溫差變化
－要多喝暖水，保充水份，滋潤喉嚨
咁就萬無一失啦！
2.）腸胃藥：
小JM媽我的確好需要帶備腸胃藥，
因為本身都係屬於腸胃較易過敏既體質。
特別係旅行／出遠門個陣，如果遇上腸胃不適都真係幾辛苦架。
有腸胃藥旁身就可以係不適個陣稍作舒緩。
溫馨小提示：
－要小心注意飲食，清潔衛生
－切忌食得太飽、太油膩，以免食滯
3.）止痛藥：
止痛藥都算係必備期用藥之一，
對於頭痛、肚痛、胃痛、生理期痛等，都可以起到一定既舒緩作用。
溫馨小提示：
－有需要的話可以再額外帶食開既胃藥都可以
－要注意休息，免得因為外遊而忘卻休息而影響精神
4.）備用外用藥／用品：
出去玩都點唔少得以下既安全藥品／用品，以備不時之需：
消毒棉
棉花棒
藥水膠布
防蚊止痕膏
藥油
就算一不小心整親、跌傷、擦傷都可以即時消毒，避免受到細菌感染嘛。
去旅行要安心又放心咁玩無難度，
帶備平安藥包就可以無憂咁盡情食、盡情玩啦！
只需要將藥物放入一個小盒度，就可以輕鬆放心外遊。
