好多時講到國際學校,大家都會話冇咩錢就咪搞喇。一陣話細路哥之間會比較家境,一陣話成日要遊學使好多錢。不過最近喺forum見到有人開post問:月入得十萬,如果小朋友讀國際學校,會唔會經濟上搞唔掂?
首先,咩叫月入「得」十萬先?好多人都搵唔到咁多錢一個月喎!好啦,咁一眾網民就覺得:除咗月入,仲要計吓開支同資產,加上想入邊間都唔知,好難畀意見架喎。原來樓主嘅目標都係價錢比較親民嘅國際學校。不過就話自己都係住唐樓,冇車出入,主要都係怕小朋友自卑。
有網民幫手計咗條數,話大概每個月拎到兩萬零蚊出嚟,加上有少少錢鬆動,應該就唔成問題。咁月入十萬銀,供埋樓同工人開支夾埋都唔使三萬,平時唔係太使腳唔抹腳嘅話,冇理由供唔到一個小朋友讀國際學校掛?
都有家長share返國際學校又冇想像中咁貴族嘅,就算一般家庭去讀,都感覺到大家好平實。聚會唔多,暑假一齊去吓camp,都唔係咩高消費活動。而且大部分時間都係由校車接送,唔知同學家境同埋住邊頭。
講到尾,讀唔讀國際學校應該視乎小朋友嘅個性同資質。教學方式係啱小朋友嘅,如家境唔太差,其實不妨畀小朋友去讀國際學校,唔應該因「個個同學都好有米」呢啲理由放棄。個小朋友係自己嘅,教好佢價值觀都係父母嘅責任。唔通出街見到名車都要掩埋佢對眼咩?