想BB瞓得好?！
-作者: Jasmine & Mama
其實 Jasmine 由出世到而家都瞓得唔好，會好容易因為少少聲音而扎醒。不過慶幸既係佢可以好快戒左夜奶，一覺瞓天光。
Jasmine 初出生既時候，好鍾意雙手投降咁瞓，但係就經常會因為自己郁而扎醒。試過用米袋扎住心口都唔得，唯一可以既，就係包到佢實一實，等佢有安全感。
包到差不多四個月，發現包巾已經唔啱用，就搵一啲長頸巾包，奈何佢慢慢已經識得拆解，包佢唔住喇！之後就試過用投降睡袋，好似有少少作用，唔容易扎醒，但係天氣愈來愈熱，用左幾日佢條頸就出濕疹。
所以到最後，只能由得佢自由發揮，只著普通睡袋瞓覺。
關於戒夜奶，其實都唔係存心戒架，只不過係因為Mama我太攰喇，又懶唔想餵。
當時 Jasmine 廿幾日大，半夜一喊，我就會俾個奶咀佢食，點知佢又唔再嘈喎，連續幾日後，佢就冇再半夜喊要食夜奶喇。
不過而家諗返未滿月戒佢夜奶其實都唔係咁好，其他媽媽千祈唔好學呀，尤其是未退黃疸既BB呀！(佢當時已經退左黃)
夜晚想BB可以自己瞓覺，可以每晚都做一啲程序等BB知道要瞓覺。
而家每一晚食完飯，我都會幫Jasmine沖個涼，洗個面，俾佢飲睡前奶，抺口，著睡袋，播音樂，佢就自然會瞓覺架喇！
同場加映：騎呢睡姿大公開
💕 Facebook 專頁 💕
https://www.facebook.com/jasmineandmama
溫馨提示：以上資料係由媽咪提供作一般性參考，並非專業嘅醫學意見。
如果有任何疑問嘅話，可以先問問你嘅醫生或專業醫護人員吖！
