父母最大的夢想是看到小朋友開心地笑
-作者: EQMAMA
小朋友點樣笑得好？
今次想講下女女最愛既動物 。點解係講動物？因為我發覺每次女女唔開心或者喊，只要出動貓貓或者狗狗公仔就可以輕易解決。女女一直都好鍾意貓同狗，但因為爸爸本身嚴重鼻敏感同埋住既地方唔養得小動物既關係，我地屋企只可以唔覺意養左檐蛇同一啲大家都唔想見到既昆蟲。因為咁我就買左一隻貓公仔同一隻狗公仔比佢，有一次佢因為係屋企玩玩下撞親而喊，我就拎狗狗公仔氹返佢，竟然即刻收聲同攬實公仔，同公仔申訴佢有幾痛，然後佢開心返晒。所以啱啱聖誕節又再送多左隻狗狗公仔陪佢，佢勁開心，因為呢隻會唱歌，有聲啵，佢當正狗狗同佢傾計咁，玩得好開心，行到邊都攬住佢。
記得有朋友問過話，小朋友成日同公仔講野正唔正常架？其實我女女細細個就同公仔講野同玩，我都有問過專業人士呢個問題，佢都話係正常架，仲可以鍛鍊到小朋友既社交能力添。我仲發現，佢同公仔玩角色扮演既過程中，成日會代入正常生活遇到既事，留意下佢講咩，可能有時會有意外收穫添呀。
其實爸爸媽媽最大既夢想就係見到小朋友開心地笑，希望所有小朋友都可以生活係快樂之中啦。
