繼續小朋友點樣笑得好。有啲媽媽會話：「我果個喊包嚟架，咩都喊咩都扭，一有半點唔順心就嚟料，唔笑架我個仔/女。」
係嘅，一樣米養百樣人，小朋友唔係個個倒模咁款好正常，正如父母都有好多種。但我地活左咁多年，你有張梁計我有過牆梯啫，通常小朋友唔高興時，我唔癲的話（當然會癲，吾非聖人）都會發揮我僅有嘅同理心去安撫佢，無論佢幾多數，幾大。
係，唔好以為人大左唔駛氹，或者喝句：「你再喊我就打你！」、「你再喊我就罰你企！」之類嘅語言暴力。我唔係咩專家，但父母將心比己，你若果已經唔開心，無論咩原因，你會想親人氹你還是恐嚇你？你想人地抱下你，拍下你膊頭講聲：「我明架，我知你唔開心。」還是「你咁都唔得，有無搞錯？」又或者「你真係好曳囉。」？情緒嘅宣泄其實無分年紀，我明白有時父母們，尤其有多過一個小朋友嘅父母們會希望小朋友（尤其是長子長女）冷靜合理聰明伶俐話頭醒尾（我老母咪又係咁諗，但可惜……），但我想講，若果佢地真係醒，佢地會駁嘴同憎左你；若果佢地豬，佢地會努力埋藏自己嘅負面感受去搏取父母嘅掌聲。Either way都非好事right？所以小朋友癲時我地一定要冷靜！冷靜！冷靜！（重要事要講三次，我同自己講嘅呢句，因為我成日癲）
有老人家（係，我成日賴老人家，因為佢地比較大方）會話：「小朋友唔縱得架，你咁就佢，生骨大頭菜呀。」、「佢喊你由佢囉，做咩即刻抱佢啫，抱慣左難湊呀BB。」、「男仔嚟架嘛就下妹妹都唔得？點做人阿哥呀。」之類之類去左右我地唔好喺小朋友不快時及時回應，但我想話仔女係我地嘅，佢地有唔開心有不安時，點解我地要扔低佢地（情緒上）。特首選舉都高舉「同行」二字啦，喺教仔女路上，除左同志同道合嘅父母一齊學習扶持，陪我行得最多嘅就自不然係自己仔女。佢唔開心，若果好明確話要自己靜下嘅，我會由佢喺安全情況下冷靜。但因為我天生八卦，我一定會喺事後係咁追問（係追問唔係拷問）番佢當時嘅感覺。先問左感覺，處理好情緒先。「呢度係屋企，唔係法庭，係人係鬼唔通父母唔知咩。」若果小朋友單純因為小事無涉及自己做錯或諗錯事而不快尚算容易解決，但若果佢地有內疚感的話，父母嘅開導就好緊要。尤其是青春期嘅小朋友，錯左都唔想認，唔係因為唔識，係因為好。我地要子女明白要喺屋企啦，要爆粗喺屋企爆啦，有咩不快喺屋企發左佢啦，咁我地嘅小朋友有咩負面野都慣左喺我地面前爆發同處理時，佢地就有安全感，我地亦從中可以加插一兩句「提點」下佢地。係「加插」唔係「插」；係「提點」唔係「醒」，有分別架各位。
共勉。
