魚蛋頭是日午餐–波菜米糊
-作者: 魚蛋媽伙食記
魚蛋頭已經慢慢開始食固體啦，之前跟住健康院派發嘅指引去加固，已經食咗粥水，濃稠嘅粥水，仲有魚蛋媽嘅愛心牌米糊。觀察咗魚蛋頭一段時間，便便都痾得ok顏色又靚，咁魚蛋媽就開始慢慢添加蔬菜。
今次魚蛋媽就加咗波菜蓉落d米糊度，睇返健康院嘅指引，波菜含有豐富鐵質有利於BB健康，咁魚蛋媽就當然要親自炮製畀魚蛋頭食啦。你睇張相，魚蛋頭食到好似污糟貓咁就知佢難服侍啦。
事不宜遲，等魚蛋媽講下點整先。首先，購買新鮮波菜，摘除莖部留低綠叶部分
（因為波菜纎維高，所以一次過唔需要添加太多），洗乾淨備用。然後，就煮濃稠嘅粥仔，等到d米煮到軟身開曬花之後，就落埋d波菜叶落d粥仔度，煮熟到完全軟身就夾返起佢（蔬菜煮過熟係會引致營養流失噶，要注意返煮嘅時間）。之後就將d煮好嘅波菜磨蓉再過篩，務求令BB品嚐到軟滑嘅質感，同樣將粥仔磨蓉過篩變成米糊狀。最後將波菜糊同米糊混合，咁就係一餐美味嘅波菜米糊啦。
如果有攪拌機嘅話就可以直連將粥仔同波菜攪溶再過篩就得啦。因為香港嘅屋實在太細啦，魚蛋媽都費事買太多電器，所以只買咗手磨嘅6合1工具去制作魚蛋頭嘅愛心餐。
因為魚蛋媽嘅寫作功力係有限公司，所以有咩唔太仔細嘅請勿介意。又係時候諗定下次煮咩畀魚蛋頭食啦，有機會就下次再分享啦，88。
溫馨提示：以上食譜只供媽咪參考。每個BB嘅身體狀況同需要嘅營養都有所不同，不妨向你嘅醫生或專業醫護人員先了解BB嘅需要啊！
