BLW呢個字相信好多人都好陌生，BMW就話識姐，咁BLW又係d咩呢？BLW= Baby-led Weaning 嬰兒主導斷奶
BB 六個月大時，飲奶已經未必有足夠營養維持身體所需，而需要加入副食品。透過BLW可讓BB認識食物，培養對食物嘅興趣。不過緊記一歲前，奶依然係BB嘅主要糧食，千祈唔好因為餵咗固體而斷奶啊！
傳統嘅做法都係會餵糊仔或者粥仔，而BLW就係完全相反：
❌不餵食❌不吃糊仔或粥仔或磨蓉
✅BB自主進食 ✅同父母同檯食飯 ✅進食大人食物
BLW嘅好處係：
唔需要好似傳統餵食咁樣追住BB黎餵（呢一樣都係我行BLW嘅主要原因）；
可以學到先咀嚼後吞，可以經常練習咀嚼能力及口部肌肉，對將來嘅語言能力都有幫助（傳統食糊仔係唔需要咀嚼既）；
可以訓練手眼協調，對之後行路要手腳協調，腦部發展都有幫助；
唔需要為BB額外準備食物，可以同大人食嘅食物一樣，不過當然要整淋啲俾BB食啦；
BB食幾多自己話事，對佢將來嘅心理發展會好d，因為傳統餵食，父母會經常驚佢食唔飽，而一直逼佢食，間接令BB唔鍾意食野。透過BLW，BB一路玩一路食，就會對食物產生興趣。
有以上嘅好處，不過當然都有一啲唔好處會令人擔心嘅：
例如會食到成面成檯甚至成地都係，不過有餵食嘅媽媽分享，食粥仔都可以食到成面都係的；
好多媽媽開始BLW之前，都會怕BB會gag，其實只要煮淋d食物，唔好切得太大，加上學定萬一BB嗆到時候嘅做法，就唔需要太擔心，因為BB本能係會識吐返出嚟。
如果有興趣行BLW嘅家長，緊記BB要自己青蛙坐到10秒以上先可以開始BLW啊！
建議睇咗BLW嗰本書，或者以下連結，甚至可以加入Facebook或者WhatsApp group先至再進行BLW都唔遲啊：
www.babyledweaning.com
～～～～～～～～～～～～～～
💕Facebook 專頁：
https://www.facebook.com/jasmineandmama
溫馨提示：以上資料係由媽咪提供作一般性參考，並非專業嘅營養方案意見。如果有任何疑問嘅話，可以先問問你嘅醫生或專業醫護人員吖！
